多蒙特前鋒真高拿喺上個禮拜六對拜仁時，代替被罰出場嘅列文串演龍門，表現不知幾咁好，高波冇甩手，低波又俾佢救到，重一球都冇失㖭。雖然最後一幕着住件龍門衫助攻入唔到，回防時撞到球證狼狽啲，但佢有咁好身手，全靠平日鍾意打籃球同埋排球。
或者有人會問，真高拿生得咁高（兩米○二），可以喺籃球界發展；據佢自己講自細就好鍾意荷蘭名將尹巴士頓，重夢想成為職業足球員㖭，所以就冇投身籃球界，專心發展足球囉。
雖然呢位捷克國腳平日都係踢波居多，但一有時間就會打籃球同排球輕鬆吓之餘順便訓練吓身手；勢估唔到佢公餘時嘅正當嗜好，對球隊咁有幫助。
𠵱家啲職業足球員，時不時蒲吧、𠝹女同埋開快車；我求大俠都明啲後生仔貪玩，但呢啲真係「高危活動」，好容易出事。如果球會嘅高層想班球員弗啲同唔想招惹啲麻煩，睇嚟要向真高拿好好學習嘞！
雖然啲人成日話，𠵱家係後生仔嘅世界，但我求大俠就唔係太同意，事關好似車路士嘅蘇拿咁，佢今年雖然成三十六歲，但係重鬼死咁弗，𠵱家喺超聯神射手榜，以九球領導群雄，令一班比佢後生十年有多嘅前鋒好似利物浦奧雲、曼城安歷卡同阿仙奴亨利等都比下去，真係問你服未！
唔知球迷記唔記得，富咸嘅阿根廷前鋒沙華早排喺入波後，喺隻襪度攞個眼罩出嚟扮鬼扮馬；而據佢自己講，佢呢個造型原來係參考自黑俠梳羅。如果個個球員都好似沙華佢咁有諗頭，咁球迷就真係有眼福囉，事關除咗可以欣賞到一啲高水準嘅比賽之外，重可以睇到咁精采嘅個人秀。
有啲球員冇正選打，就會更加努力，希望換番個上陣機會；但有啲就自我放棄，人工照攞，一於玩樂大過天：車路士嘅澳洲龍門保斯尼治就屬於後者。呢位車仔超級大後備日日掛住玩，最近重俾人傳佢俾車仔驗到曾經吸食可卡因。唔好話我求大俠唔提醒佢，如果佢再係咁落去，真係遲早玩完。
前NBA球星巴克利由選秀到𠵱家，一直對姚明有彈冇讚，佢喺噚日火箭對勇士一場波開賽前，更揚言如果姚明能夠喺場波攞到十九分，就會錫姚明屁股咁話，結果係點？姚明咪上陣咗七分鐘，攞咗三分囉！其實姚明一向當巴克利係偶像，但估唔到自己嘅偶像會咁睇死自己，我求大俠認為姚明依家又多一個發奮嘅理由。