八方聽歌就聽得多，「睇歌」都係第一次。香港中華基督教青年會聯青聾人中心，噚日喺德福廣場舉辦嘅全港第一屆手語歌唱比賽，八十幾人、十隊來自五湖四海嘅參賽者，有聾啞、智障、傷殘人士，甚至健聽都有！男女老幼，場面好鬼墟冚。
膾炙人口嘅《獅子山下》，除咗由梁錦松念口黃，由羅文雄渾唱出外，原來透過一雙靈巧嘅手都可以深情演繹，但最後都畀肥妹妹鍾翠珍柔情演繹嘅《終身美麗》贏咗。
評判依據手勢美感、音樂節奏、形象台風等各方面評分。聾人中心主任陳潔玲話，今次活動拉近咗健聽同聾人嘅距離。一班健聽人士願意學習手語，一齊參加手語歌唱比賽表演，聾人其實好感動，覺得有「正常人」進入佢哋嘅世界，深一層感受到被社會接納和關懷。
傳真︰2623-9278
電郵︰