巴士迷、HelloKitty迷、郵票迷……膜拜者炫耀的，多離不開晒冷心儀玩物；不過，像Maggie鍾愛大頭妹Blythe，除了平日去街、唱K、往外地旅行，都必定帶埋Blythe外，還會像《天使愛美麗》般帶她四處留影；閒時又會做衫做帽給她，做到連港、台、韓都有人問她要貨。Maggie邊拍照邊說：「我幫佢買咗幾對Nike！二百幾蚊對，唔平㗎！」說到「迷」，這樣才徹底！
記者：吳佩璇 攝影：伍慶泉
Maggie自拍靚相
今年2月，Maggie才在網上邂逅這隻頭大眼大沒身材的Blythe公仔，「我覺得佢好靚，着啲衫好似真人衫，好Stylish、好Human。」讀時裝設計出身的Maggie對貼近人性的Blythe，一見鍾情，一買回家就立即替她左度右度，發現Licca的衫仔亦啱Blythe，便開始搜購其他合身的Figure衣飾，「𠵱家去親旅行都顧住買衫畀佢，有時我寧願買畀B女（Blythe暱稱）都唔買畀自己！」
不久，Maggie更自己動手車衫給Blythe！買吓車吓，車吓又買吓，家陣閒閒哋都有幾百件衫，單是鞋仔已經有過百對，塞滿5、6個公仔衣櫃，簡直妹仔大過主人婆，比主人還要多靚衫！曾任職網頁設計的Maggie，因利乘便就將親手做的Blythe公仔衫上載到個人網頁上。今年6月辭去童裝設計的工作後，更不斷參考日本雜誌，創意源源不絕，加上Maggie做事快手，由心目中有概念，到車好一件公仔衫，只需個零兩個鐘，「快手嘅話一晚起到5、6款衫。」
直至有天，收到網友留言，說想買她的公仔衫，「我都諗過會有人想買，因為有一班玩Blythe嘅人，但就冇乜地方賣Blytheo嘅衫。」只是沒想過會那麼受歡迎，一天可收成二十幾封電郵，於是就正式在網上售賣獨家設計的Blythe公仔衫。
真正意想不到的是，竟有賣日本潮流百貨的台灣商家垂青，還專程從台灣飛來香港找Maggie。Maggie的爸爸在大陸做生意，她便索性到東莞找廠商生產，不過，由於產量少，而且細細件蝦人做，最後惟有逐件由人手HandMade縫製。可能是質素有保證，現時共有2間台灣商舖、1間韓國Online店及1間本地玩具店，都有零售Maggie的出品。再加本身網站每月平均去貨六、七十件，以每件百零蚊計，收入還不錯。
Maggie出街，每次Blythe都有份，去旅行更至少帶3個公仔，重要幫佢哋執不同的襯衫，然後一個玩具喼咁齊齊飛！即使日常進餐、唱K、去沙灘，都一樣行到邊影到邊。一些在機場拍的照片，更甚有《天使愛美麗》Feel！家中電腦整個桌面都是它們的相，保守估計都有過千張！
短短半年時間，Maggie的網站已聚集了1,800名會員。上月更搞了一次聚會，共15名超級Fans齊齊約出沙田見面。「哎吔！你幫佢個嘴搽啲乜？咁靚嘅！」「呢件衫我都有呀！」就這樣說上大半天！最墟冚是十幾個經悉心打扮的Blythe齊齊大合照。Maggie更一早做好十幾套一式一樣的三點式，作為見面禮送給一眾Fans。大家興致勃勃，即席着上，合成一張Blythe水着鬥性感的誘人照片，相當頂癮！
已打算明年到日本進修Styling，「到時唔再Design新衫畀B女，會專心讀書。況且公仔衫個Market好窄，而我嘅目標係想擁有屬於自己嘅品牌，開舖頭。對KidsWear都幾有興趣，又或者搞DIYClub。」玩公仔時十足小女孩的Maggie，思想一點也不細路。
年齡：23歲
學歷：沙田IVE時裝設計系畢業
工作：曾任ToyDesign、WebDesign、KidsWearDesign。現賣Blythe公仔衫、雜誌專欄作家、Freelanceprojectdesigner
Blythe清單：9個大公仔、8個匙扣公仔、5套Accessories、2件Tee、1個HandBag
公仔衫：約5百件
公仔鞋：約2百對
公仔帽：數十件
假髮：十多個
網址：
近兩年在潮流界興起的Blythe，早在1972年由Kenner出產，可惜Blythe頭大眼大冇身材，在當年來說可能太過前衞，出產1年就叫停。直至2000年，紐約一名攝影師GinaGaran，帶Blythe環遊世界拍下多款造型照，並推出《ThisisBlythe》攝影集，之後便一炮而紅。