霍震霆同朱玲玲嘅長子、現年二十二歲嘅霍啟剛，自舊年同東華三院前總理楊永堂嘅外孫女呂慶欣分手後，年多以來被影到同五位唔同女性約會，所以有「新一代𠝹女公子」稱號。
而霍啟剛近日同南華體育會主席盧潤森愛女盧恬兒熱戀，佢哋兩個早排喺中環蘭桂坊拍拖，重俾人影咗當街親吻嘅親熱照片。
就好似前晚十點半左右，霍啟剛同盧恬兒，以及鄭紹康同兩位朋友，由銅鑼灣蘭芳道行到去渣甸坊，估計佢哋啱啱一齊食完晚飯散吓步。馮仁昭見霍啟剛同班朋友一邊行一邊傾偈，佢哋傾傾吓重索性停低腳步講到雞啄唔斷。至於盧恬兒就一直拖住男友霍啟剛隻手，重好甜蜜咁望住佢。
梁詠琪（GiGi）嘅新專輯《魔幻季節》因為成績好，所以得到韓國商人嘅注意，搵佢為網上遊戲「神之領域首部曲––惡魔島」唱主題曲。GiGi話平時都會打機紓緩緊張心情，佢話：「遇啱好緊張嘅時候，我打機時可以進入虛擬世界，自己化身做另一個角色，可以乘機減壓。」
今個星期六（十六日）喺台灣高雄舉行嘅《金馬獎頒獎禮》，原本金馬獎執委會打算請舒淇做頒獎嘉賓，但係舒淇已經推咗佢哋話唔會去喇。有消息話舒淇因為緋聞男友黎明一早應承咗，做金馬獎嘅頒獎嘉賓，而舒淇為免同黎明同場出現而俾傳媒吼實，所以決定唔去。舒淇咁做似乎有啲斬腳趾避沙蟲喎！
馬浚偉前晚去咗電視城錄影無綫音樂節目《勁歌金曲》，佢早排同郭羨妮嘅緋聞，雙方都搞到好唔開心。馬浚偉嘅胞姊見細佬咁可憐，就買咗水晶手鏈畀佢戴，佢話：「家姐話戴咗呢啲水晶可以幫助遠離是非。」唔知馬仔戴咗水晶鏈之後，會唔會順便遠離埋郭羨妮呢？
肥媽瑪利亞由噚晚開始免費幫「國際廣告萬花筒」活動唱歌跳舞，肥媽除咗一個人一腳踢搞掂排舞排歌嘅部份，重出動埋全家人，包括兩個仔、兩個徒弟同埋個老公幫手。點解肥媽唔收錢？佢噚日喺伊館話：「就係滿足感，一手一腳做係完全唔同，就算唔收錢都唔緊要。」