劈酒，形式不外乎「光明頂」（斟酒斟到滿瀉為止），一杯接一杯狂自隊，飲完會好飽；興起，啤酒樽朝天，一口氣吹喇叭，飲完會好頂；再激點，啤酒罐開個小孔，玩Shot-gun，飲時好搶喉；最新劈法叫「極速潛龍」，叫法懶有型，查實即是用啤酒樽玩Shot-gun，勁搶喉，又飽又頂之餘，重一定飲到嘔白泡。
記者：陳漢榮 攝影：伍慶泉
問何時興起此劈法，Golden2000經理祥哥答：「一個月前左右。」誰人發明？「唔好問我，我都唔知。話說上個月，四五個OL落嚟劈酒，聽清楚，係劈酒，唔係飲酒，佢哋飲得好癲，一桶又一桶，女仔之家半粒鐘唔夠，掃咗3桶，估唔到佢哋咁飲得。」
落Order時，OL們還向Waiter索取吸管，祥哥摸不着頭腦：「我心諗，玩嘢咩？用飲管隊啤酒？」上前搭訕，恍然大悟：「原來佢哋放支飲管入樽然後吹喇叭，一口氣隊酒，咁會有Shot-gun嘅效果。」一試，果然搶喉。「原理同用罐裝啤酒玩Shot-gun一模一樣，吹喇叭時飲管會入氣，一入氣就會起泡，起晒泡嘅啤酒會加快搶入喉頭，我第一次飲都『逐』親，好堅！」
之後祥哥走訪其他酒吧，發覺真如OL們所言，用酒樽玩Shot-gun是近期大熱的劈酒方法，不少Wet妹飲到滿嘴白泡，「女仔玩到濕晒身都唔介意，男仔反而少玩，可能麻甩佬唔鍾意用飲管隊酒咁姿整啦！」那因何叫「極速潛龍」？祥哥說：「見咁Hit，咪搞遊戲用啤酒樽鬥快Shot-gun囉，至於個名，我老作嘅，玩遊戲嘛，起個懶爆嘅名咁解啫。」
相信不少蒲友都試過用罐裝啤酒玩Shot-gun，「極速潛龍」又點玩法？模特兒Viki一次過示範畀你睇，啤酒搶喉嘔白泡之餘，更要有心理準備玩到濕身。
渾身濕透的Viki說：「着薄衫就唔好玩啦，玩得預咗無儀態，成件衫一定濕晒！罐Shot等於飲急酒，唔會起咁多泡，重有換氣嘅餘地；樽Shot其實係灌酒，樽底一向天，啲酒就無休止咁直灌喉嚨，無時間換氣，勁好多，我飲到『逐』親呀。」
笑爆嘴！有女仔唔識玩，以為用吸管鬥快吮酒，知道要吹喇叭就耍手擰頭，臨陣退縮，「極速潛逃」，最後得2位參賽者完成比賽，可能女仔嘴細，最快都要用12秒完成。
玩慣玩熟的Janet以極速12秒完成，兼無濕身情況出現：「Easy啦！我同班Friend不嬲都係咁飲，我哋玩得重激，插2支飲筒一口氣飲，重搶喉呀！」
比賽開始，Jennifer（圖左）與Kathy興高采烈地用吸管猛吮，到知道何謂「極速潛龍」後，一試即縮沙。Jennifer說：「點飲呀！想攞命咩，根本飲唔切。」
初哥Eva飲後，「唔係咁堅啫！如果頂得住唔換氣嘅話，一定飲得晒，不過用呢個方法嚟劈酒，唔使三兩支就貓梗！」
玩遊戲，獎品其次，攞彩行先，參賽的男士們全部未玩過「極速潛龍」，但成績卻出奇地好，飲得最快者只需4秒，最慢者10秒內完成，當然嘔的比飲落肚的酒還要多。
玩完口水鼻涕流兼狂咳不止的兆輝：「我第一次玩咋，我飲第一啖已經『逐』親，好惡頂，不過出得嚟玩，唔通臨陣退縮咩！忍住唔咳繼續隊囉，無換過一啖氣，一清完支酒我忍唔到喇，狂咳！估唔到自己會贏。」
給人強推出來玩遊戲的Rick：「黐線！都唔係人玩嘅，根本控制唔到啲酒幾時入喉嚨，一戙高個樽，啲酒就猛灌入嚟，啲酒勁多泡，根本吞唔切，飲完好飽，頂住道氣，𠵱家好想嘔，想嘔番啲泡出嚟呀！」
自認吹慣喇叭的Ray：「我大啤都吹喇叭，何況細支樽裝啤酒？不過講真，加咗支爛鬼飲管之後確實係惡飲，因為飲時空氣入得好急，變相要你飲得急啲，將就番啤酒入喉嘅速度，跟唔切就死。」
店名：Golden2000
地址：尖沙嘴寶勒巷28至36號華寶商場地庫
電話：23679933
收費：
星期日至四：HappyHour嘉士伯$72半打，其他啤酒$15支；NormalHour嘉士伯$156半打，其他啤酒$28支。
星期五、六：HappyHour啤酒$19支；NormalHour啤酒$32支。
有乜好玩：逢星期五11:00pm玩「極速潛龍」遊戲，每星期出兩位冠軍，11月30日各冠軍人馬再競逐總冠軍，獎品結他形CD機，幾盞鬼！