經紀李消息果然靈通，早成個月率先畀料，話無印喺新港開新店，今個禮拜無印終於開舖，生意聽講唔錯。問經紀李有冇其他新料？經紀李：「不如講吓銅鑼灣，近半年租金仍然企硬，就算入到去禮頓道嗰頭業主仍然要企硬租，唔肯跟通縮。
「聽講最近有部份業主重想逆巿加租㖭，原因係見到區內不時有排隊人潮，排隊嗰班全部係14、15歲𡃁仔，屬於最強消費力嗰班，嚟得排隊梗係會使錢，順勢又帶旺埋附近店舖，咁好理由，業主點會唔把握？」經紀李果然精明。
諗起經紀李所講嘅排隊潮，應該係指由教父P幕後畀意見嘅幾間舖同關刀專門店，每逢返新貨或搞Function時就有細路支持排隊，附近做舖開心之餘，其實地產經紀心裏最歡喜。
聽講教父P最近搬咗Studio，地方大咗好多，唔知係咪為新計劃鋪路？問經紀李有冇收到風，佢只答：「佢哋啲Project好保密，街外人唔會知，唔似其他人未成事已周街唱，所以咁多海外名牌或Artist肯合作。
「成日話經濟唔好，但銅鑼灣嗰邊啲生意多到做唔切，想去金百利仍要排隊半年，租金冇得減。就算銀座地庫𠵱家都冇空位，好多水貨佬鍾意搬落去，話晒做裏原宿水貨生意，一定銅鑼灣好過旺角。」
主持人：大食Jack
八卦熱報：