峇里大爆炸死傷枕藉，國泰高級副機長BarrieKing當時亦喺現場，佢雖然只係輕傷，但有啲好友不幸罹難，所以都感慨良多。今期國泰刊物《國泰天地》就有佢一啲感受。
身為欖球球證之一嘅Barrie，雖然喺峇里留下慘痛嘅回憶，但仍然好關心峇里嘅居民。佢好感觸咁話：「雖然深覺欖球圈以至全世界不久可自慘劇中復元過來，但峇里人民似乎已經被世人遺忘。」八方睇到都有少少同感。講番Barrie嘅傷勢，佢臉頰擦傷，雙耳受震，聽覺至今仍有問題，所以已經暫停飛行職務。
另外國泰將於下月六、七日一連兩天在大本營、即位於機場的國泰城舉行嘉年華，邀得多名本港紅星出席，包括一位神秘嘉賓，八方好想知係邊個。國泰方面只肯講，嘉賓包括方力申、李彩樺等，又準備咗多項攤位遊戲，重有免費食物及飲品供應㖭！
﹙圖﹚BarrieKing好關心峇里居民。《國泰天地》圖片
傳真︰2623-9278
電郵︰