小初上周同幾個經紀朋友吹水，佢哋話唔好以為二三線股呢排冇搞作，其實好多股仔暗地裏做咗好多嘢冇人知。好似中國特種纖維（285）雖然配股傳聞不時出現，但股價仍然企得好硬淨。
經紀黃解釋，原本呢隻股嘅街貨，係由一班大陸炒家坐晒，但自今年初以來，佢哋不斷搵人批貨出街。小初恍然大悟，原來年中時聽到配股嘅傳聞，其實唔係公司要配股集資，而係呢班大陸炒家想批貨出街。
經紀黃話，其實大陸炒家已經批過幾次股，但股價仍然企得好穩陣，皆因接咗貨班芬佬應承佢哋唔會亂沽貨，有時真係唔到你唔服。
講開批股畀芬佬，做紡織嘅冠華國際（539），近期股價逆市抽高，由0.80元水平炒上1.10元，兼且頻頻出現非自動對盤成交，市傳係有芬佬接貨之故。但小初唔明，點解芬佬在0.80元時唔喺市場買貨，而要炒高先接貨，唔通稍後有動作跟尾？
慕容小初