哈利波特電影第二集《消失的密室》已鐵定於下個月19日上映，雖然暫時未有得睇住，但哈仔最新推出的玩具精品，經已排山倒海咁湧入市場，實行為電影預早造勢。食住上年哈仔產品大賣特賣的氣勢，今次呢批配合第二集的玩具可謂更加多元化，布公仔、ActionFigure、場景模型等等固然唔少得，而今年重加咗好多益智的BoardGame，突出哈仔的健康形象，大人細路都啱玩。
記者：尹珊珊 攝影：伍慶泉 ImageBoy：Javier、Jason
故事講述哈利波特完成霍格華茲魔法學校第一年的課程，在十二歲生日那天，小精靈多比突然出現，警告哈利一旦返回魔法學校上學，將會受到傷害，果然學校接二連三發生意外，牆上亦被塗抹『密室已經打開。傳人的仇敵們，當心了。』哈利被同學懷疑是那個傳人，最後，究竟哈利能否面對學校的黑暗邪惡勢力？消失的密室怎樣打開？
有睇過電影第一集的人，相信都會對這副哈利版的國際象棋有印象吧！記得電影版裏面的棋子係識得郁，不過真實版都唔差，起碼手工細緻又有立體感，比起傳統象棋有趣味得多。
Javier：雖然我唔識得捉棋，但副棋咁得意，搞到我都有興趣去學。
Jason：我平日都好鍾意捉國際象棋，但就無呢副棋咁靚。
睇過第一集的小朋友，相信都會好羨慕哈仔可以飛天玩魁地奇，𠵱家你都可以玩埋一份，不過玩法就由坐飛天掃帚改為搶答問題，卡上超過一千條問題是從哈利波特故事中抽出，除咗可測試你的狂熱程度，順便重可以學埋英文，一舉兩得。
Javier：每隻公仔都好靚，好得意，不過幾難玩喎！
Jason：唔係太熟哈利波特個古仔，所以覺得無咁好玩！
同大富翁的玩法差唔多，玩家要在最短的時間，到每間商店買到指定物件，然後回到目的地，玩法唔算複雜。
Javier：個玩法都幾似大富翁，好易掌握。
Jason：唔係好刺激，但可以消磨好長時間。
Javier爸爸：話就話細路仔玩，但原來都有難度，連大人都差啲考起呀！
基本上玩法同普通UNO無分別，最大賣點係卡底印有的角色造型，以及在第二集出現過的場景，真係買咗都未必捨得玩，最啱哈仔Fans同卡迷珍藏。
搖擺魔法樹的玩法看似簡單，只需用飛天車的掛鈎，將樹枝上的行李鈎出，數量最多者勝利，但由於樹枝同樹身都會不停上下左右轉動，而樹枝又可砌出超過一百種組合，玩起來也有一定難度。
Javier：睇落好似好簡單，原來都幾考定力。
Jason：呢個遊戲都唔錯，不過玩得多會厭。
神秘密室有幾恐怖？咪就係有條流螢光黏液的大蛇係正門口，對付入侵的外來者囉！呢種螢光綠色的魔法黏液，似足N年前的鬼口水，但質地較稀，無咁黐手，唔怕玩到成屋污糟晒，不過螢光黏液只係隨盒附送，無得散買，要補充便需要連公仔一齊買。
Javier：嘩！好核突呀！不過真係好過癮！
Jason：呢種螢光黏液好正，摸落好黐手，但又唔難洗，唔怕整污糟屋企。
上集哈仔有飛天掃帚光輪二千傍身，第二集則有葛來分多之劍對抗敵人，呢把畀得小朋友玩的玩具劍，當然夠晒輕身，最厲害係可以發出六種擊劍聲，而且重要好逼真，相信每個男Fans都想擁有。
在眾多哈仔玩具中，以這間霍格華茲魔法學校Playset最具睇頭，每間房間都會有一個小機關，開啟電源後，機關便會轉動，營造出猶如魔法一樣的效果，留意其中一間房就是第二集《消失的密室》的主題──密室的所在地，到時可以配合附送的透明哈仔一齊玩。
兩款可摺合的活動屋仔，參照哈仔遇到搖擺魔法樹的冒險情節，以及榮恩破舊的洞穴屋設計而成，背後有活動機關，另備有配件可接合在魔法學校Playset上。
這個4.5吋高的追捕手公仔，是參照哈仔玩魁地奇比賽時的打扮，將繩頭兩端的手環拉緊，再將哈仔向上下搖動，便能做出飛天的動態。
在第二集首次出場的精靈多比(Dobby)，性格愛管閒事又調皮，所以首辦公仔背部藏有暗掣，按緊後雙手和頭部會左右搖動，表現出佢百厭星的個性，而旁邊的彈跳機係用來彈蛋糕整蠱人。
首辦公仔一般都是以收藏居多，卻少有像這套3.5吋迷你公仔，把印台和印章藏在配件上，同時可以玩埋蓋印仔。
這兩隻3.5吋高的海格和鄧不理多迷你公仔，其實內有乾坤，事關公仔手中拿着的魔杖和雨傘，內藏有磁石，只要向恐龍仔和鵝仔一揮，即可將牠們吸起，故名為「魔法」公仔。此外，在片中飾演校長一角的演員李察夏里斯，早前因病去死，這個以其樣貌造型的鄧不理多迷你公仔，定必成為炒家獵物，有升值潛力。
恐龍蘿蔔(Norberto)是第二集的重角之一，理所當然會成為Fans的收藏對象，且外形塑造得栩栩如生，只要將恐龍雙腳向外一拉，雙翼即伸展至20吋長，可做出拍翼飛翔的姿態。
一睇呢隻蜘蛛亞辣哥(Aragog)個樣咁兇神惡煞，唔使問都知係反派角色啦！佢個造型同原著差不多，長度縮細咗都有成15吋，只要用手指按着背部的掣，蜘蛛前腳便會夾吓夾吓，並將獵物夾起，極富攻擊性，要留意是蜘蛛腳頗尖銳，唔多適合年紀細的小朋友玩。
各大百貨公司及書局、屈臣氏、玩具反斗城