美股上禮拜五下跌，港股暫時仍會反覆，稍後向一萬點推進。炒輪，可採低買高賣策略，搵定啲有潛力嘅藍籌，吼低低哋之時買入相關Call輪。長實（001）上禮拜一見高位54.75元後，跟住禮拜二至五，高位都喺54.75元，低位則喺53元，收53.75元。53元嗰位好實淨，護盤行動積極。
個市暫時反覆，長實有可能挫一挫，然後再升，趁挫一挫之時，可以諗吓執啲相關Call輪。主角係9517，隻輪明年2月到期，現價44.5仙，溢價8.7%，槓桿率12.1倍，吼住40仙邊邊買貨。炒慣長實輪嘅人都知，9517係短炒搵米對象，易買賣，贏輸即刻見功，其次係9515。
美國又出口術明年初要打伊拉克，局勢稍為緊張，油價稍為上升（上禮拜五美國石油每桶升0.11美元）。油價未必會因為伊拉克嘅事大升，但由9月高位碌到𠵱家，已經唔見19%，又復見6月低位，有見雙底迹象，油價有短期反彈機會。
短炒油股Call輪，可以諗吓中海油Call輪9299（現價7.1仙）同中石油Call輪9070，記住如果買入，咪坐盤坐得太耐。
章盛