相信唔少日本藝能界嘅fans都有留意到，啲日本女星結婚嘅話，例牌舉行記招公告天下，然後反轉手板大騷婚戒！呢個傳統大大話話幾十年冇變過，搞到𠵱家啲明星明明冇銀，都要買隻名牌戒指充撐場面！
好似今個月尾先擺酒嘅小室哲哉，佢第三次娶老婆唔單止要搞千人宴，重同KEIKO去銀座卡地亞買隻成粒車厘子咁大嘅鑽戒，聽講話要成二百萬港紙，堪稱全行最貴！而松田聖子都唔輸蝕，佢九八年第二次結婚嗰陣都戴住隻一百四十萬嘅戒指現身。
安室奈美惠同吉川日奈打扮新潮，但一講到婚戒，始終係要買大牌子卡地亞同Tiffany，不過就只係萬幾蚊貨仔，好彩佢哋有笑容搭夠。講到最誠實嘅新人，就肯定係鄉裕美囉，佢雖然都要買卡地亞，但就講明用咗佢六個月人工！