競選香港區人大代表，拉票活動非常緊張。賓架M身為選舉委員會成員，自不然係各方拉票對象，據佢講，港區人大代表名額共三十六名，截至星期四，據佢所知，有五十八人攞咗紙預備參選，但佢又探到消息，其中三人係記者，唔係旨在選人大，而係報咗名參選之後，就可以攞到好多競選資料，方便採訪工作，所以呢三位候選人可以不理。
但仍然係差額選舉噃，爭選票要打崩頭，賓架M就日日俾人call到頭暈，只有推得就推。之不過，銀行界亦有多人競選喎，賓架M點走得甩呀。賓架M唉一聲：「嗱，淨係中銀集團就有林廣北、盧重興、吳亮星、馮志堅四個，佔咗三十六個名額之中嘅九分一，多唔多啲呀，叫我點投票，唔通選晒佢哋？我覺得中銀集團真係野心大咗一啲！」
另外佢就係中總會員，中總新會長即係舊會長，曾憲梓做完兩屆，依會章規例退任，讓陳有慶做咗四年（兩屆），曾憲梓又出嚟做過，豈真做開有癮？不過佢年紀細（約六十七歲），鍾意做就做啦，難得咁多會員投佢一票。曾憲梓想話叫晒所有參選人大而又係中總會員者，搵一日齊集一起，一同造勢；但賓架M就話：「中總又唔係政黨集體參選，造乜勢啫，個個都以私人名義參選啫，如果走埋一齊，為曾憲梓個人造勢就真！」