屯門二手樓價大災難,個多禮拜差唔多跌咗三成,唔通個市真係咁悲?原來係受區內銀主盤超低價成交拖累,造成短時間出現樓價暴跌。
屯門地膽祥益地產營業董事謝澤銘話,過去一個禮拜,屯門有部份銀主單位喺拍賣場以插水價成交,搞到二手放盤又要再降價先賣得出。
好似新屯門中心四座高層G室,547呎,上個禮拜四拍賣以每呎1243蚊成交,噚日就錄得每呎1023蚊嘅二手買賣,跌幅近一成八。謝澤銘重話,原來10月31號,該屋苑二座高層F室銀主貨,喺拍賣前成咗,呎價有1408蚊,咁計法即係一個多星期,呎價唔見咗兩成七。
同區居屋兆山苑C座中層銀主單位拍賣前沽咗,做到每呎955蚊,但估唔到兩日後J座高層六室,拍賣呎價得番821蚊,兩日冇咗一成四。
謝澤銘估計,屯門樓價可能會再跌多兩成,咁大部份屋苑嘅呎價好快只得三位數字。
第四季係豪宅嘅世界,九倉嘅尖沙嘴擎天半島二期,同新地嘅西半山寶珊道一號,應該差唔多同期登場,兩大發展商已開始各自造勢。
由於擎天賣點之一係海景,所以九倉今日就安排記者喺船上睇樓,等大家可以唔同角度欣賞個盤,認真識得「靠水吃水」。
不過,地產代理就好似冇馬灣珀麗灣嗰陣咁瘋狂,搞海陸空活動。睇嚟發展商要自己搞嘞。
新地上個禮拜五突然宣布,將軍澳嘅將軍澳中心同清水灣半島,提供現金回贈促銷,蘭西噚日去將軍澳中心睇吓點環境,場面唔算太熱鬧,估計周末嘅反應都唔會太好。
另外,發展商喺商場內設咗個收樓處,原來今個禮拜五,第五、七同八座首先交樓,至於仍開放現樓示範單位嘅第六同九座,就好似話遲一兩個禮拜。睇嚟發展商要加把勁快啲賣貨尾至得嘞。
因為一單掌刮緋聞,搞到全港市民都知邊個係上海富商周正毅,佢有份發展嘅上海豪宅東方倫敦●伯爵豪園就快嚟香港賣,邀請記者去睇盤。噚日代理華置行講明發展商唔會出現,點知睇緊示範單位時,突然見到周生同埋老婆毛玉萍,同一班衣着光鮮嘅男男女女,浩浩蕩蕩直闖示範單位。真係意外驚喜,蘭西梗係唔放過機會訪問兼影相,點知俾人叫停,重有行家被拉開,唔准接近周生㖭。
唔通周生唔知代理安排記者嚟參觀,咁啱撞正?
好彩周生唔係全程生人勿近,其間有一句冇一句咁講,上海樓市冇泡沫,重看好地產發展,最後問周生會唔會留番個單位自用,佢好大聲兼肯定話唔會。
上個禮拜五蘭西去深圳採訪賣地,現場有資料畀,第一頁寫住參考新聞稿。唔通未賣就知道結果咁神奇?
再睇落去:「11月8日下午三時,在深圳市土地房產交易中心,公開拍賣寶安區沙井鎮一塊地皮」。跟住就係地皮嘅資料。第二段就係「包括……等在內的知名品牌地產商參加今次競投,拍賣底價為……元,經過激烈角逐,由持……號牌……公司奪得,成交價為……元。」
之後幾段講沙井鎮嘅發展同經濟實力。嘩!咁樣記者咪剩係填幾個字,一分鐘唔使就可以交稿。
裏面幾頁係拍賣公告、位置圖同沙井鎮情況簡介,夠晒全面周到。不過,講到錢就去到邊都冇價講,寫明唔接受郵寄、電子郵件或口頭申請,競投人士一定要交保證金,要喺指定日期前,滙入指定銀行戶口,總之冇錢冇得投!
長實趙國雄早前話搵李鵬飛幫手,搞旺尖沙嘴港景峯商場,內容係點就唔肯透露。蘭西日前見到長實嘅廣告,一切疑團都解開。原來商場改名叫「金怡購物天堂」,係由李鵬飛同金怡假期董事長葉慶寧籌組成立嘅一站式消費購物商場。
商場地庫可以停泊幾架旅遊車,方便旅行團帶隊嚟慢慢買嘢!至於賣啲乜?當然係珠寶首飾、工藝品、時裝、皮具、古董等遊客想買嘅啦。
個廣告話,加入嘅商戶要向消費者提供購物保障,同十四日百分百退款,重強調所有商品要貨真價實。若果要喺呢個場開檔,獨特商品嘅商戶可以獲得優先考慮喎!
蘭西
電郵地址: