剛收身成功的「籮霸」韓君婷，由最高峯期的一百四十二磅，激減三十四磅到現在的一百零八磅後，自言重拾所有信心。收身後，韓君婷的衣櫃內盡是充斥着以前不敢穿、但又最愛的熱褲和迷你裙，而且偏向鮮色調。
韓君婷選美後投身娛樂圈，其下圍一直成為談論的目標，「籮霸」這稱號更不脛而走。終於「因禍得福」成為纖體代言人，韓君婷經一番努力，由一百四十二磅減到現在的一百零八磅，她替纖體公司拍的性感硬照，更叫人談論不已。
對此韓君婷說：「其實我覺得輯相係性感得嚟夠健康，我嘅性感只局限喺工作方面。其實思想上同着衫方面我都係保守派，並冇意思走性感路線。」
問韓君婷穿衣之道時，她說：「未收身前我成日想辦法去掩飾我肥嘟嘟嘅身形，例如着深色衫或者係鬆身cutting嘅衫。𠵱家減肥成功後，我就多咗好多choice，近期重最愛着miniskirt同熱褲，然後配一件上衣加一對長boots，呢種打扮會顯得雙腿更加修長，而且重好chicandfunky。𠵱家我衣櫃裏面起碼有十條miniskirts同hotpants，顏色重會揀啲鮮色，好似綠色、黃色同粉紅色。」
自言「最緊要靚」的韓君婷，其愛靚的性格原來是受媽媽的影響。她說：「我細個時媽咪每次出街，都會扮到靚一靚，所以影響埋我同哥哥都咁貪靚，我哋可以話係貪靚家族。所以為咗要靚，我就努力收身、做facial、做laser漂牙等，希望以最靚嘅姿態上鏡，總之扮靚大過天。」
這次雖然成功收身，但韓君婷仍要保持最佳的狀態示人，所以每日都保持適量的運動，她說：「我每日都會競步三十分鐘以上，跟住去做treatment，重有嘅秘訣係每日飲六杯綠茶，因為咁樣可以有效去水腫，不過減肥一定要有恒心先得。」
今次韓君婷示範了的四個東瀛品牌，分別是AtsuroTayama、OZOC、A/T及INDIVI。每個品牌均以青春的少女服裝為主，但各具特色。
例如有今年秋冬大熱的patchwork牛仔裙、披肩，以及富有民族色彩的服飾等，頗有mixandmatch的味道。
韓君婷示範後，亦覺得設計十分富青春氣息，不過她對今年秋冬大熱的束腳褲特別情有獨鍾，韓君婷說：「我覺得條束腳褲設計十分特別，着上身後好有型，而且重係嚟緊嘅大熱item。」
採訪：JessicaNgan
攝影：ChanChiLam
化妝：KylieChan
髮型：RayMorkofTripleEdge
服裝：AtsuroTayama、OZOC、A/T、INDIVI
場地：ConardHotel