王秀琳（Mango）早前被指唱片公司要她一碟定生死，若最新唱片成績不理想，便不再為她出碟。前晚Mango罕有地以tubedress性感亮相，盡最後努力留住歌迷。
王秀琳、陳慧琳（Kelly）、陳冠希、余文樂、陳小春、鄭希怡（Yumiko）等前晚於電視城錄影《萬誠保險愛心獻再生》節目，三位女歌手Mango、Kelly及Yumiko中，以Mango衣着最性感，她以一件米色連身tubedress亮相，露出香肩，相當突出。
Kelly及Yumiko則只以雞翼袖上衣襯長褲亮相，相比之下較為失色，不過Kelly則甚受現場小朋友觀眾及演出的學生歡迎，不斷被要求合照。
早前有報道指新力唱片為Mango推出新碟後，要視乎其銷量決定以後是否繼續為她出碟，似是一碟定生死，Mango前晚突然性感示人，難道要博到盡宣傳？她解釋說：「其實公司本來安排咗件衫畀我，但有小小問題着唔到，後來就即刻去買過件。本來呢件衫有件外套，公司都支持我以健康嘅性感示人，話買咗唔好嘥。」
問Mango有否做防走光措施，她說：「冇做呀，件衫係橡根頭，黐唔到膠紙，惟有出場時又掹又揪，唔畀佢跌囉。」
另外，陳冠希、余文樂、蕭正楠及麥浚龍屢傳不和，早前有指王晶有意找四人合作為噱頭開新戲，陳冠希說：「王晶搵我拍戲係年幾前嘅事，但我哋冇正式聯絡過，我唔介意同佢哋合作，一齊做嘢啫，我唔覺得有乜壞處。」余文樂則說：「我十二月唔會拍電影，要專注唱片，如果要合作，我本人唔介意。傳媒話我哋不和講到似層層，其實我哋自己知乜事，我都有Juno電話，亦成日見到蕭正楠。」
採訪：卓寶花、胡比
攝影：甄朝健