袁詠儀（靚靚）及鄭則士等，昨日於深圳為亞視新劇《法外情2002》舉行簽名活動。
靚靚昨日得知好友梁家輝涉醉駕撞車後，笑說：「我前晚都見到梁家輝，不過我諗係喺佢撞車之前。當時我咁啱又過隧道，喺九龍入口見到個好高大好似梁家輝嘅男士，同個的士司機理論緊，我重叫我司機揸慢啲睇清楚，之後都見冇嘢，梁家輝重揸車走咗，點知今朝睇新聞就話佢撞車。但我明明只係見到佢同的士司機理論，點知佢出隧道口就撞咗。」
其實昨日凌晨梁家輝的寶馬是在紅隧九龍入口與城巴及一輛豐田私家車發生碰撞，其後三輛車在隧道職員勸喻下，齊往港島區出口處理論，疑靚靚目睹之的士司機，應是該名巴士司機。
問到靚靚可有致電梁家輝問候時，她說：「我邊敢打畀佢，我自己都有少少內疚，可能我見到佢嗰陣有幫手，之後就冇事呢！」
採訪、攝影：王崇穎