運輸署噚日舉行幸運車牌拍賣可謂星光熠熠，八方喺現場除咗見到港區全國政協盧文端外，無官一身輕嘅工商局前局長周德熙同埋太太黃英琦都拍住拖嚟湊熱鬧。
周氏伉儷喺會場內不時密密斟同做筆記，八方昅到，周德熙喺張車牌名單上，圈住三個車牌：BB80、KL678同9938，唔知佢老兄係嫌價錢太高，定係其他原因，最後都無出手競投，留咗四十五分鐘就走人，令八方大失所望。而呢三個車牌，最後亦只有頭兩個分別以二十二萬同一萬四千蚊成交，底價成十三萬嘅9938就無人問津。
成班記者行家見到周德熙呢個車牌拍賣會稀客，梗係要問吓佢「係咪第一次嚟」、「有冇乜心水車牌呀」呢啲例牌問題，但佢都只笑住咁搖頭，反而有記者問佢係咪嚟「視察環境」？佢就大力點頭，真係莫名其妙。
講番盧政協，佢噚日出手非常闊綽咁以七萬六千投咗個KK163。佢同八方講，自從喺八九年買咗部配以163車牌嘅勞斯萊斯後，事業一帆風順，所以從此就愛上163組合嘅車牌，至今已先後投得三個有字頭嘅163車牌。佢話，對KK163志在必得，就算幾多錢都會買，而且重已經交咗一千蚊按金畀運輸署，準備喺下次拍賣會再競投另一個163車牌。
傳真︰2623-9278
電郵︰