余文樂噚日同麥浚龍（Juno）同小雪去荃灣，出席「保護遺棄動物協會」活動。以前養過狗嘅阿樂，見到啲狗仔咁得意，就算有鼻敏感，都忍唔住同佢哋玩，阿樂重捉住其中一隻史納沙狗仔，趴喺地下度，用佢部手提電話影合照，十足大細路咁。
不過，經常傳出同啲歌手，好似蕭正楠、陳冠希等人不和嘅阿樂，原來除咗人緣唔多好之外，原來連狗緣都一樣唔係咁得。嗰隻史納沙狗仔，最初都肯圍住阿樂行嚟行去，但係後來就愈嚟愈唔聽佢話，阿樂叫佢行，隻狗就好懶咁坐喺地下度。阿樂想同佢kiss，隻狗就好冷淡唔領情，重好鬼寸咁即刻擰歪面，請阿樂食檸檬。
另外，Juno之前俾雜誌寫佢人緣唔好，無綫服裝間嘅阿姐都憎佢憎到掉佢件衫落地，Juno話：「冇咁嘅事，TVB啲嬸嬸對我好好，尤其係化妝師成日同我傾偈。」
周杰倫喺下月十三號開始，喺紅館開三場個唱。前日開始賣飛，唔夠四十五分鐘就賣晒，搞到好多買唔到飛嘅歌迷喊晒口。本來主辦單位話如果要加場，頂多只可加十二號或者十六號兩場，不過噚日台灣有報道話暫定只加開十六號一場。
據聞其實周杰倫就唔多想加場，佢接受台灣傳媒訪問時，知道有啲歌迷一買就買幾場飛，佢唔想啲歌迷睇極都喺嗰啲嘢喎。
有傳李萬祺喺九龍塘一間餐廳「撻朵」話同老闆好熟，食完嘢係咁意簽個名就走人。李萬祺噚日喺佢做公關嘅愛立信慈善小型賽車比賽度，好勞氣咁話：「真係覺得一沉百踩，我起碼幾年冇去過嗰間餐廳食飯。如果我真係咁本事，指吓個鼻簽個名，就可以唔畀錢食飯，我帶晒你哋班記者去又點話！」
楊紫瓊前晚出席喺香港禮賓府舉行嘅「100PointofLight」地氈慈善拍賣會，為「母親的抉擇」籌款。楊紫瓊為場內小朋友簽名，重主動同佢哋影相。
楊紫瓊表示自己長期捐助支持呢個會，佢話：「我覺得社會有咁嘅機構照顧一啲被遺棄嘅細路仔，係一件好事，我冇助養兒童，只係捐錢同出一分力。」
王力宏本來打算完成香港宣傳後，就到內地繼續宣傳，但因為一曲《W-H-Y》至今都未申請到批文，新碟未可以係內地推出，惟有取消行程返台灣。王力宏話：「首歌歌詞有段rap，有句意思係『食屎』嘅日文粗口，係我拍日本電影時學嘅，覺得有用咪寫囉。其實內容係我寫畀全球華人音樂圈嘅心聲，都預咗會被禁。」