十四年前，李萬祺（Henry）首次參加澳門格蘭披治大賽車，在芸芸港澳車手中勇奪葡國盃冠軍，正式展開他從未間斷的賽車生涯；今年九月初，被勒令破產的李萬祺，仍然參加下周日舉行的東望洋房車賽。大戰前夕，本報特別找來這位香港頂級車手，與讀者分享他多年來與賽車結下的不解緣。圖/文：李勇明
記 ：記者 李 ：李萬祺
記 ：為何喜愛賽車運動？在多年來，最深刻是哪一場比賽？
李 ：我鍾意賽車，除因為本身對跑車一見鍾情外，最重要就係喺跑道上，嗰種同車手互相爭位、你追我趕、人與人之間競爭嘅感覺，我非常享受。至於最深刻一場比賽，我覺得係○○年嗰屆東望洋大賽，當時我揸架標誌306，全程力抗英國名車手夏理遜，最後我都頂得住攞第二，呢一年我重因呢場比賽而獲得亞洲房車賽全年總冠軍。
記 ：參加了澳門格蘭披治大賽十四年，你覺得東望洋跑道特色何在？
李 ：眾所周知，東望洋係一條以街道組成嘅跑道，佢同一啲有緩衝區、防撞欄嘅正式賽車場好唔同，危險性多好多；喺一條左右都係石屎牆嘅跑道比賽，車手絕對唔容許犯錯，我諗呢個就係東望洋引人入勝嘅地方。
記 ：今年東望洋大賽參賽車手卧虎藏龍，你認為哪幾位車手最有爭標機會？
李 ：上屆冠軍許士文今年繼續用寶馬參戰，無論喺車輛性能或對賽道嘅認識，佢都係頂級。另外，德國冠軍勒連尼同一級方程式車手大衞遜，同樣係爭勝分子。
記 ：今年你用福特Focus參戰，覺得呢架車嘅性能可唔可以同呢班頂級車手鬥一鬥？
李 ：今年曾經揸同一架車鬥過六回合嘅香港房車賽，其中五次都可以企上頒獎台（三冠一亞一季）。事實上，福特呢架車嘅操控好好，為咗今次東望洋大賽，車隊特別提升咗架車嘅馬力。至於可唔可以挑戰呢班外國車手，我認為賽車除咗鬥技術、鬥車輛性能，運氣都好重要；只要以上三方面做到百分百，我有信心第一名衝線。
記 ：現時已經四十四歲，你有沒有想過何時結束賽車生涯？
李 ：年齡並唔係車手最大障礙。舉例嚟講，一啲拉力賽車手，佢哋嘅年齡去到成五、六十歲。今年，好朋友雷冠賢借咗部雷諾方程式畀我參加咗六場比賽，好好彩場場都可以擊敗中、日籍等車手奪標。所以，我希望未來可以向方程式方面發展。如果有贊助，我重打算參加下年亞洲方程式賽㖭。
記 ：前兩個月你宣布破產，那麼對你參加賽車、或日常生活有甚麼影響？
李 ：冇錯，我係破咗產。對我嚟講，破產最大傷害就係喺社會上冇咗信譽。至於日常生活，由於我以前唔係住三萬呎豪宅、揸十幾部名車嘅奢華生活，所以破產後嘅生活只有少少改變；反而，喺賽車方面就好唔同。以前鬥車，第三已經好滿足，𠵱家，就算排第二，都好有鬥心去追頭車。可能係咁，今年嘅成績先至會特別好。