雖然美國格老用「盡地一煲」呢一招，希望救番美國個市，但喺好多負面經濟新聞下，似乎唔係好見效，加埋殊仔總統喺國會班自己友夠照，可能美國最終都係要靠打仗嚟刺激經濟。不過，話分兩頭，如果到時打完伊拉克後，美國經濟都唔肯掉頭回升，真係唔知點算，唔通要再打過另一個邪惡軸心國？
前個禮拜招股唔成嘅中國電信（728）上個禮拜捲土重來，雖然個價就無點減到，但集資額就大幅降低咗五成五。伏勝聽番班行家講，話隻股份喺第一次招股失敗，主要係反映大戶無興趣，同埋國內長途電話接駁費前途唔明朗嘅關係，所以今次即使縮細個集資額，都應該唔會吸引到班大戶，所以話絕對唔會「入飛」。
不過伏勝就覺得諗得過，皆因隻股除咗縮減集資額外，聽聞重會以最低價1.47元嚟定價，剛好等於資產淨值，所以個價應該跌極有限。有個喺包銷行做嘅朋友重話，喺國際配售部份已經收咗幾個歐洲「芬」盤，到時貨源歸邊要升絕對唔難。
呢幾日除咗部份息口敏感股被炒上去之外，部份高息股亦加入咗升市行列，喺呢個低息年代，投資者要搭順風車其實都唔係咁易，所以都開始睇番啲高息股，就好似隻葉氏化工集團（408）咁，唔聲唔聲喺上個禮拜已經升番上1蚊樓上。有經紀朋友叫伏勝一定要睇實呢隻股，尤其隻股就快公布業績，相信喺業績公布前會有一定炒作，睇番上年嘅業績就有唔錯嘅升幅，而且隻股息率有成5厘幾，買佢一定好個擺錢係銀行。個朋友重話，上個禮拜五開始有班大戶喺1蚊樓上吸貨，應該唔止睇呢個水平，各位留意留意。
伏勝