加拿大女歌手ShaniaTwain雖然係以鄉謠女歌手身份出身，但九七年開始行性感路線，結果隻唱片淨係喺美國已經大賣二千萬張，更加令佢成為巨星級歌手。闊別五年嘅Shania最近又再出動，佢為咗加強全新大碟《UP》嘅聲勢，重用咗五千萬港紙拍咗個史上最貴嘅MV！
Shania首新歌《I'mGonnaGetchaGood!》嘅MV，全長四分二十秒，製作費相等於日本天后濱崎步早排嗰套四十五分鐘音樂片《沉溺月亮》七倍有多，若計埋時間，直情貴足七十幾倍㖭，呢個MV亦打破咗英國歌手佐治米高（GeorgeMichael）今年初嗰首《Freek!》嘅MV所創下嘅最高製作費紀錄，事關Shania嘅MV足足貴一倍。
我大口羅拉最初睇Shania嘅新MV都大嚇一跳，佢竟然大玩科幻，除咗扮成着透視魚網衫嘅未來歌姬之外，重化身女戰士揸電單車飛嚟飛去，同機械人展開刺激追逐戰。又睇吓Shania今次賺唔賺得番！