香港棒球風氣唔算好盛，不過棒球服飾就因美式街頭文化大熱而大行其道，一頂棒球帽，oversize棒球衞衣同風褸，襯上板仔褲或牛仔褲，絕對係型仔型女大熱之選。
MajorLeagueStadium係香港最「齊貨」嘅棒球服飾專門店，唔願上鏡嘅負責人Dave說：「MajorLeagueStadium已開咗四年，同美國生產廠商已經有良好默契，可以直接訂貨，所以好多棒球帽、棒球衫都係全港獨家。」
Dave表示，芸芸美國職棒隊中，以老牌球隊紐約洋基最具吸引力，好多新客都係指定買洋基產品，另外有日本好手鈴木一朗壓陣嘅西雅圖水手、同NBA球星佐敦短暫客串過嘅芝加哥白襪（佐敦曾效力白襪嘅小聯盟隊）都有一定捧場者；由於美國職棒有成三十支球隊，加埋大學隊更加不計其數，為了滿足不同客人，Dave重會幫客人直接喺美國訂貨。
此外，呢度亦有售賣棒球裝備，包括球棒、手套同棒球鞋等，並為本地棒球隊訂做制服。
文：盧漢傑
本身係棒球愛好者嘅Dave，特別喺MajorLeagueStadium內擺放枱櫈同梳化，讓志同道合嘅客人有聚腳地，Dave說：「通常都係熟客坐，我哋重會播放棒球比賽錄影帶、又有遊戲機打，都幾舒服；夜晚嚟，重可以睇吓旺角夜景㖭。」店內重賣埋即沖飲品，好似間小型棒球cafe咁，係棒球迷傾波經嘅好地方。