張栢芝近日同謝霆鋒甩拖，有傳霆鋒重投王菲懷抱，搞到栢芝情緒失控，同梁家輝又攬又摸下巴之外，重經常蒲夜店。
據知栢芝有時就算唔出街，佢同細佬張豪龍都會約埋班朋友，喺佢哋大埔康樂園嘅寓所開派對。呢班後生仔都唔理係咪騷擾到鄰居嘅安寧，晚晚開爆機聽歌，搞到啲鄰居冇覺好瞓。
栢芝一家日頭就話可以大覺瞓，養足精神夜晚再玩過，但係佢啲鄰居個個要一早返工，總之就冇覺好瞓，所以啲鄰居陸續開始將間屋放盤，對呢家人避之則吉。
馮仁昭亦聽講栢芝個阿爸鬍鬚勇好「環保」，佢見到鄰居放咗支高爾夫球桿喺花園，佢就問人哋係咪唔用，如果係就咪嘥咁話，鄰居見佢咁講，咪送咗畀佢囉！
二人組合Shine噚日去新城做節目訪問，佢哋知道新唱片首批限量版賣晒，而身邊助手大爆佢哋話唱片賣得好就會請工作人員食飯，但Shine聽到話要請工作人員食五位數字嘅慰勞宴就笑住咁耍手，不過其後Shine嘅又南話：「我哋覺得賣到五萬張唱片先算係好成績，有時間我哋會請食飯嘅。」
蔡少芬噚日喺無綫電視城為即將開拍嘅新劇《陀槍師姐IV》試造型．佢雙眼浮腫，而且聲音沙啞。蔡少芬話：「我噚晚開始感冒發作，我一陣都會睇醫生。」佢又話日前同林保怡以清裝扮相拍新劇《金枝慾孽》時要化老妝，搞到皮膚敏感。
蔡少芬噚日喺電視城重撞見吳啟華，吳啟華話同無綫前監製鄧特希搞咗間製作公司，但唔知細節會唔會同無綫有牴觸，所以返無綫同高層傾吓。吳啟華話：「我好有信心製作公司會賺錢，而首個劇集係時裝劇。」
商台有個節目日前舉辦咗一個「至愛新人選舉」，噚日公布結果，男新人王得主係蕭正楠，而女新人王就係人氣組合Cookies。噚日蕭正楠同Cookies嘅隊長Stephy接受電話訪問，蕭正楠話除咗幫自己打咗支強心針外，重會請同事食飯慶祝㖭！而Stephy就代表Cookies多謝公司、fans同父母。
寰宇電影公司老闆林小明早前同星爺周星馳嘅恩恩怨怨，搞到要上法庭解決。前晚佢出席金鐘一個活動時，重提呢件事。佢話𠵱家單官司排緊期，短期內都唔會考慮同星爺再合作，但係佢又特別補充同星爺呢件唔開心嘅事，絕對冇影響佢投資拍戲嘅雄心壯志咁話。