「請問在電腦網上『咇嘢』是甚麼意思?」早前《百萬富翁》潮流之夜，陳啓泰問了參賽者這樣的一個問題。「咇」者，英文Bid也，即投標拍賣。據以上所見，網上競投不但是潮流玩意，今時今日更是好普遍。瘦田耕開有人爭，拍賣網曾是很多人的搵錢門徑，但有話現今網上出貨太濫及供應太多，再加上經濟不景氣，貨品炒價更大不如前，事實再無靠Bid賺大錢這回事。今日就讓eBay拍賣網的賣家現身說法，教路兼解說市況，不論要放貨搵錢抑或要買心頭好，必讀。
記者：梁珮瑜
eBayer是eBayseller之暱稱，四眼文就是一位有五年經驗，以網上賣貨賺錢為正職的eBayer，成交次數過千宗。據他所言，網上賣貨大致分兩類，「第一類是屋企清貨，將唔要物品不計成本扔上網賣，好過幾十蚊部電視益收買佬。第二類是賣潮流貨，例如波鞋、手表、Figure、名牌貨、懷舊家具及香港玩具等，早兩年唔少香港人賣香港玩具在網上撈咗筆，不過𠵱家已經唔得喇。𠵱家就算原價賣都好難，好多人都係蝕賣，如果新手做eBay比已往就更難撈，因為無口碑，鬼佬唔會輕易信你。」所以他計劃淡出eBay界，轉為兼職eBayer，「奉勸做eBay應係興趣行先，搵錢為後。」
同樣不願上鏡的恭夫輝99年開始eBay生意，成交次數近一千宗。「我一直兼職做eBayer，除了為幫補收入外，最正係可遇到來自世界各地嘅人，學識點同人交往。原來你好禮貌啲，個Buyer會畀錢快啲，重會介紹好多客畀你。因為做eBay係c2c（costumertocostumer），好易學咗好多與人相處之道，原來世界各地有好多勁人。」而恭夫輝亦同意現在靠eBay不能搵大錢，幫補一下還可以。
四眼文：「賣Nike波鞋仍有不錯利潤，香港最出名的eBay波鞋Seller是michael_ip，行內估計佢每個月純利港幣$25,00-$30,000。他賣的波鞋很多都未斷巿，不用『責』貨。只要去相熟波鞋舖影張相，然後在eBay出貨，收齊錢和確定Size後才去花園街幫外國客入貨。」屬無本生意，不妨參考。
JamesJarvis的Silas公仔去年在香港有不少死貨，有舖頭試過要減價出售，eBayer：「估唔到Silas公仔今年突然興番，聽說是英國本土十分流行，但當地又少Silas公仔賣，所以留存在香港和日本的貨便水鬼升城隍。」Silas公仔一般原價約港幣$750-$6,000。
「在eBay賣雜誌好處是不用『責』貨，收到錢先去報檔補貨。其實香港周街都有錢搵，視乎你識唔識。例如試過有Kaws或Nigo作封面的香港雜誌原價$20，在eBay上平均竟可賣到$68（最高更賣過$155），連郵費亦可賺過百蚊，獲利五倍以上，而且成交近20宗，成為近日香港eBay佳話。而只要有報道特別版波鞋或美國Artists消息的，都可扔上去賣！」
一般DVD如非絕版，有人接貨才入貨，可無本生利。「其實最多香港人賣的是DVD，你明喇，他們從好景或信和入貨，是正版還是翻版、台灣『正版』抑或羅湖商業城『特別版』已搞不清了。好似早排海關已拉過幾個專賣翻版的。」