美股杜指周四大跌184點，港股噚日偏軟，恒指收報9770，跌73點，成交59億元。格老重手減息半厘，似乎已被市場消化，市場焦點再次放在企業盈利及經營前景，港股焦點唔使問都係放在解決財赤及樓市方面。
以往，政府向豪宅成交徵收較高釐印費，及推出種種壓抑樓價措施，都未能令樓市降溫，主要因為市場一直認為買樓可致富。如今政府經常話要令樓價平穩，不想樓價下跌之餘亦唔想樓價大升，試問缺乏理想回報，邊個會買樓投資或用一生積蓄買樓？
此外，樓市另一隱憂是政府官員經常對樓價指指點點，縱使日後經濟復甦，樓市亦難以大升。其實香港經濟能否復甦，財赤問題能否解決，好大程度取決於地產及金融市場表現，但阿董繼續自說自話，所有資金只能呆在台下睇表演，而阿董嘅表演亦太多悶場，單是救市措施就令人等到頸都長。
中國在十六大前宣布落實QFII計劃，但有分析員擔心此計劃若成功，香港作為中國跳板的作用將大打折扣，因為外資毋須再在香港買中國概念股，國內企業亦不一定要來港上市集資，對港交所（388）及香港金融中心地位影響深遠。
不過，市場有不少聲音認為QFII的落實，意味QDII快將實施，北水南調的大渠道將開通。但到目前為止，阿虎覺得只係一廂情願嘅睇法，紅籌及國企股是否長遠看好，真係好難講，不過短期應該重有得炒吓。
下周二上市的蜂蜂天然生命（8156），突然向外公布獲中國糧油集團入股7.5%，擺明想為掛牌首日造勢，此股公開認購有逾70倍超購，炒味之濃可見一斑。市場更傳出中糧有機會增持至接近10%。聽聞申銀為此股搵咗條大水喉，到時勢必熱鬧。
阿虎