美國減息半厘，幅度大過一般預期。港股初時冇乜反應，卒之恒指都有70點進帳。
地產股跑贏大市，好應該，供樓成本點都會減輕啲，樓市未必因為減息而升，但唔會因為減息而跌。傳統正路賣樓股最為得益，新地（016）升75仙，收50.75元，未升得夠。昨日話新地Call輪9525靚過9524，升1.5仙，大過9524半個仙，兩隻輪𠵱家條件相差唔遠，買邊隻都冇所謂，9525交投比較旺。新地未來一兩個月有機會升三兩皮，揸9525有機會執三四成利潤。隻輪明年3月到期，現價29仙，溢價9.2%，槓桿率17.5倍，數據屬唔曳。
電訊股亦係跑贏大市，電盈（008）大概因為係債王，減息得益大，升9%。聯通（762）升4.9%，中移動（941）升1.5%，大概因為中國電信（728）重新招股塵埃落定，少咗不明朗因素而得益。
3大電訊股搵Call輪炒，中移動兩件熱門貨色最啱，9532同9526買賣易，炒即市如果搵得正嘅話已經有三茶兩飯。9532昨日收16.9仙，只升得0.7仙，升得少過9526（升1仙），稍為抵買啲。聯通升幅大過中移動，會帶動中移動跑番快啲，揸9532同9526贏面大，何妨打孖買。
章盛