搬屋此檔事跟戀愛一樣，是換畫愈多就愈清楚自己追求甚麼；我這個平均一年搬一次屋的女人仔，dreamhouse是：
一定要細，大屋無安全感，理想實用面積三百呎左右。一定要有露台，無頂的，好想在家淋雨。一定要無橫樑，亦無鐵閘、無窗花。窗子一定要望唔到鄰舍，就是挖鼻孔都無壓力；一定唔用窗簾布，亦一定要西斜，西斜好海市蜃樓，我鍾意。門口一定要有洗手盆，着完鞋可以洗手。一定要開放式浴缸，最好有發熱線煲住自己，浸極都係熱水。一定要有三張床，一張在露台（望住天空做愛），一張是沙發床（耐唔中當客人般招呼自己，有在外頭過夜的感覺），一張是正方形、沒方向的床，最好黐住落地玻璃，鍾意有瞓街的感覺；無落地玻璃就放正室中央，黐牆的床好壓迫感。廚房也要是（唯一的）睇電視的地方，也一定要放得落飯枱（那麼就無需要廳了。）全屋都不要吊燈，除非吊到落腰，跟高過自己的燈換膽有恐懼症。可以無冷氣，但一定要有暖氣，中央式的。音響都要是中央式的。牆上挖一個窿放寶物，然後用幅畫遮住。
結論：Well，就是一間唔makesense的dreamhouse，跟我的dreamguy一樣，在滿限制的男女關係中給我無限自由，兩者都是得個dream字。
（編按：康妮續稿未到，暫停一天。）
容雅慧
逢星期四至日刊登