鍾絲同蒙哥馬利噚日喺沙田體育學院引來了一陣哄動，連正喺體院單車場練習緊嘅香港車神黃金寶，都專登靜靜「偷雞」走過田徑場，一睹男女飛人嘅風采。點知佢一現身，在場過百個小朋友即時大聲歡呼，搞到阿寶有啲不知所措。冇幾耐，當鍾絲同蒙哥馬利係田徑場上出現後，阿寶趁大家唔為意，又神不知鬼不覺地返回去單車場練習，認真低調。
兩位香港亞運金牌得主趙詠賢同傅家俊，噚日有機會同「世界男女飛人」見面，當然係好興奮，不過令佢哋最煩就係唔知着乜衫出席好，原來大會好鬼抽象咁要求「醒目衣着」（smartcasual），查實着運動裝又可以醒目，着西裝又可以醒目，到底邊一款最合適。Rebeeca同Marco為免失禮，都決定執到正盛裝到會，最後證明兩人嘅決定很明智。Rebeeca重攞埋鍾絲簽名㖭！
噚日六點幾當鍾絲同蒙哥馬利喺體院做完晒訪問，班記者行家都走晒後，兩人獨自留喺田徑場操練；根據小記離遠觀察，佢哋主要練習跳欄同起跑等動作，直至七時半右左先至離開。之後，由於鍾絲同蒙哥馬利好想食神戶牛柳，點知主辦單位搵咗好耐都搵唔到一間正宗嘅神戶牛柳餐廳，最後惟有返回佢哋入住嘅酒店，食咗點類似神戶牛柳嘅「極黑」牛柳。