十一月、十二月勁作不斷出籠，三大主機將最好嘅Game排成搶灘陣式，係咁意數吓都有十幾二十隻大作登場，咁多選擇Game迷難免花多眼亂。唔想投資錯誤，將寶貴聖誕假期及金錢白白浪費，就要留意今日Game壇各路人馬嘅心頭好。
記者：徐影龍
攝影：朱崇德
福田
職業：《GameWatch》總編輯
機齡：21年
強項：RPG、Puzzle
弱項：無
Game壇猛人福田入行七年，先喺《GamePlayer》一鳴驚人，到𠵱家坐正領導《GameWatch》，一直都獲唔少機迷擁護，筆者尤記得當年佢負責SS版嘅《真．女神轉生～惡魔召喚師》攻略，因為實在太難玩，全港得佢一個做到全攻略：「當年隻Game真係考起唔少人，不過我對《女神》系列情有獨鍾，所以要揀年尾心水Game的話，一定係首度登陸XBOX嘅《真．女神轉生NINE》，全3D地圖同戰鬥畫面外，連敵人都立體化，動作自然更豐富多變，而且獨特氣氛得以保留，不論係咪Fans都值得一玩。」
「不過認真揀的話，當然係GC嘅《BioHazard0》啦，畫面正唔在講，新加系統令玩家有更大探索要求，解謎方式同難度都因而提升，氣氛又一流，加上前傳式故事揭開喪屍之謎，夠晒吸引……」雖然佢領導嘅《GameWatch》攞到《BioHazard0》香港獨家攻略本版權，咁讚法略嫌硬銷咗啲，不過平心而論喪屍魅力的確沒法擋，尤其係今集獨特拍檔式系統，令遊戲難度及變化大幅提升，絕對屬年尾壓軸Game熱門之選。
夜行雲
職業：《GameWave》編輯
機齡：13年
強項：RPG
弱項：射擊、動作
夜行雲入行日子四年，唔算太長，不過以女孩子嚟講，能夠適應香港周刊式工作流程，實屬難得。「其實呢行都唔算太辛苦，做咗四年乜都習慣晒，目前工作性質係乜Game類型都要做，由於懂得日文，所以玩起RPG上嚟零舍有Feel，要揀聖誕之選，雖然《StarOcean》要延期到下年三月，不過另一隻NAMCO嘅《TOD2》我都好期待，因為前作故事非常出色，令我好感動，主題曲又正，所以順理成章期待新一集。再揀會係SQAURE隻《UnlimitedSaga》，前三集一致好評，雖然第四集《SagaFonitor》有啲失望，不過今次睇畫面同系統都好正，應該值得一玩。」
小白
職業：文員
機齡：15年
強項：戰棋、射擊
弱項：格鬥
小白絕對屬於一個瘋狂機迷，除咗由小學開始到𠵱家打足15年外，重表示今年重頭Game特別多，唔理三七二十一勁掃，係咁意數吓都有十隻必買正Game。「今年XBOX決意擴大市場，令三大主機猛出勁Game力保不失，一般機迷難以消化，不過我冇時間玩都會統統買晒，勁煲最鍾意嘅《SDGundamG-GenerationNEO》後，會試吓隻《DOA沙灘排球》，除咗勁正女角造型外，重可以買唔同嘅泳衣畀佢換，滿足晒男人心理，其他Game要等有時間先再開嚟玩，正一係唔玩都買嚟睇吓。不過唔係因為我錢多使唔晒，而係我實在太鍾意Game，大部份花費都係以Game為主，見到啲Game好有滿足感。」
大雄
職業：漫畫投稿員
機齡：6年
強項：戰棋、RPG
弱項：模擬、Puzzle
相信有睇過無綫《香港一定得》節目，都會對呢位熱愛漫畫嘅大雄有印象，原來佢除咗鍾意畫漫畫外，對打機一樣咁難捨難離：「目前主要靠投稿為生，加上夜晚要上設計堂，金錢及時間上都唔算充裕，不過自己一向有捧開《PanzerDragon》系列場，貪佢喺天空度飛夠晒自由自在，戰鬥時畫面又靚又刺激，若要揀聖誕之選的話一定係《PanzerDragonORTA》行先，加上XBOX行貨賣價只係$1,599，相信連埋隻《PanzerDragonORTA》都係二千蚊度，經濟上總算負擔得起。」
「若金錢或時間許可，會買埋GAMECUBE隻《薩爾達傳說GC》，除咗質素有保證外，卡通式表現手法都好啱我，話唔定激發到我漫畫創作靈感。」
雪貓
職業：雜誌撰稿員
機齡：12年
強項：冒險
弱項：格鬥
雪貓真人跟筆名一樣，畀人一種沉默柔弱嘅感覺，不過令人意外係閒時喜歡玩恐怖類型遊戲：「我的確鍾情一系列《BioHazard》、《SilentHill》同《ClockTower》遊戲，不過聖誕佳節咁有歡樂氣氛，我當然揀番隻開心啲嘅Game喇。首選我會揀番RPG類，不過近年對一啲名牌RPG失去信心，講創意一定係SCEI隻《DarkChronicle》，因為入面除咗發展劇情外，重有養魚、起城鎮等要素，唔會齋打咁悶。」