今時今日，作為一個新世代的全能OL，除咗要有強勁的工作能力，一身打扮都要有番咁上下。空有一套大方得體的套裝都重未夠，重要加埋一個襯到絕的手袋，咁先算係內外兼備。趁住今日有出口歐日的手袋清貨開倉，姊妹們梗係要落足眼力揀番個，不過大大話話有成五千個款，點揀呀？好，𠵱家就有請OL界「3T」，率先同大家推介一系列絕世好袋，咁就唔怕走漏眼啦！
記者：尹珊珊 攝影：陳陶鈞
職業：保險從業員
心水推介：欖形頭盔袋
原價：$960
開倉價：$300/2個
貨量：50個
身為保險營業員的Irene，周不時都要出街見客，平日打扮要夠Trendy，又不能太誇張，以免讓客人留下壞印象。「這個墨綠色格仔手挽袋，外形似足一個倒轉了的頭盔，打開後袋身縫製成一個大布袋，放入雜物後將繩紮實，再塞番入袋裏面，唔會咁易俾人偷嘢，個款又無傳統公事包咁悶咁老土。」除了綠格仔絨布，並有小量藍色格仔和人字絨兩種選擇。
職業：護士
心水推介：紅白風車格手袋
原價：$550
開倉價：$80/2個
貨量：5個
個性較斯文的Esther，對款式女性化的手袋情有獨鍾。「由於我上班後才會換上制服，所以平日毋須帶很多雜物返工，這個花花手袋雖然細細個，但已足夠我放銀包、電話和鎖匙，而且袋形同埋顏色都好搶眼，襯裙或襯褲都可以。」這個款式高貴的手挽袋，以紅白相間的風車絨布製成，質料挺身，單是扣在袋上那朵皮製花花，成本已貴過開倉價，但由於是貨辦關係，故此數量不多。
職業：會計
心水推介：實用帆布皮繩袋
原價：$760
開倉價：$300/2個
貨量：100個
任職會計的Clara不時會帶文件回家處理，故集中火力在尺寸較大的手袋上。「這個帆布側孭袋可放置A4Size文件，夠晒實用，以皮繩代替拉鏈的設計，簡單中又見特色，而且帆布袋容易打理，就算整污糟都唔會肉痛。」這款側孭袋以加硬了的帆布製成，就算放小量物件，袋形依然很堅挺，另備有黑色和墨綠色兩種。
呢個由牛仔布加牛皮製成的手挽袋好YoungLook，本身質料挺身，不易變形，內櫳夠大夠深，並附有暗格拉鏈袋，實際功能同時兼備。
原價：$430
開倉價：$150/2個
貨量：50個
絨布長形手挽袋款式與某意大利名牌手袋相似，價錢卻差天共地，重量比一部手提電話還要輕，放了雜物也不覺墜手。
原價：$850
開倉價：$300/2個
貨量：50個
參照醫生出診用的手挽袋設計，拉開拉鏈後再將兩側摺起，增加內櫳的空間，令袋子看起來不會太笨重，另有搶眼的墨綠色可供選擇。
原價：$850
開倉價：$300/2個
貨量：50個
質料觸手柔軟，款式襟興大方，內籠夠大又夠深，可放置大量物件，就算用來赴宴或見客都絕不失禮。
原價：$1,290
開倉價：$300/2個
貨量：50個
呈長方形的側孭袋，可算是最長青的返工手袋款之一，就以這個風車紋絨布製造的側孭袋為例，可放入大量的A4Size文件，且底部及角位分別車上牛仔皮，袋子夠挺身之餘，又不怕被袋內的硬物弄穿，再加上現時正值秋去冬來的季節，絨布質料更予人有一份溫暖感。
原價：$540
開倉價：$150/2個
貨量：40個
8蚊雞可以買到乜？可以買到呢個澳洲板仔牌子Juice背囊，澳洲嗰邊要70蚊澳元㗎！共有藍黃同黑灰兩色任揀，左右側分別設有拉鏈袋，每人只限購買一個。
原價：$350
開倉價：$8/1個
貨量：200個
今次開倉的手袋會以顏色牌來劃分價錢，包括黑牌（$300/2個）、白牌（$150/2個）同黃牌（$80/2個），原意是希望客人可以揀兩個同組別的手袋，不過如果真係揀唔到，都可以單獨買一個，價錢係牌子的一半。另外，提醒你場內部份手袋屬貨辦，只此一個，愈早去自然愈着數。
開倉資料：701號倉
地址：尖沙嘴東部加連威老道94號尖東廣場106-107號舖
(尖沙嘴地鐵站B出口，百樂酒店對面。)
電話：95778933
開倉日期：今日起至11月11日
時間：上午10時至晚上10時
付款方法：購買滿$800以上可使用Visa及Master信用卡簽帳。