經濟發展及勞工局局長葉澍堃算係董內閣嘅福將之一，自佢老哥上場後，香港嘅失業率竟然神奇地逐步下調，由高峯期七點八降到七點四。葉局長對住八方好驕傲地承認自己嗰瓣有啲「起」色，一定要多謝各位商家老闆撐場，響應政府請咗啲新畢業生，免得大家咁彷徨，愈嚟愈悲觀。
葉局長可以叫得做「勤有功」，佢話自己為咗要鼓勵各位大小老闆請人，只要嗰間公司肯聘用一百個新人，佢都會親自去打氣。上個星期六、星期日就去咗華潤同國泰嘅招聘會；下個星期工聯會陳婉嫻等人喺黃大仙騰龍墟開檔，佢都會去。「一齊繼續努力啦！」局長不斷咁講。
咁但係的確有啲僱主頂唔住，或者有啲害群之馬，趁年尾執笠炒人，局長都認「過完年請食無情雞」係難以避免，但最緊要係大家覺得前景明朗、有得做；好似迪士尼咁，明年會請成幾千人，唔使愁喎，到二○○五年重會有一萬八千個空缺㖭。
八方對啲數字唔係咁大興趣，覺得遠水不能救近火，但係就好想問局長，如果有夜總會或者骨場又請咗一百人，佢會唔會去剪綵助興？點知局長個新聞秘書話：「會啩！」局長話咗會去就去㗎喇，老細唔使客氣呀！
傳真︰2623-9278
電郵︰