利來控股（221）掛牌表現，真係令小初有啲失望。隻股噚日收0.30元，雖然較招股價0.25元，高出20%，但隻股以全日高位0.33元開出，噚日喺市場買入投機短炒嘅朋友，好多重未有機會食胡。
雖然經紀陳話呢班炒家唔似咁短癮，但以噚日嘅走勢嚟睇，就有派貨迹象。小初覺得，睇埋隻股今日嘅表現，就要作出沽貨決定，千祈咪留戀太耐。
新股上市陸續有嚟，今日重係打孖上，其中一隻創業板新股浙江永隆（8211），小初就聽唔到消息，反而朗迪（1142）就收到少少風。經紀黃話，原來隻朗迪係聲稱要收山嘅大檸檬新作。
大檸檬自從同肥仔反面之後，收埋咗自己好耐，今次無端端出山，相信都係錢作怪。
不過，今次同以往有啲唔同，大檸檬舊陣時鍾情於創業板股，但今次朗迪係主板股，叫價應該有所不同。根據大檸檬往績紀錄，朗迪頭幾日點都會有一番熱鬧。
慕容小初