港區人大選舉報名呢幾日搞到上環信德中心人頭湧湧，除咗人大、記者、其他有心參選嘅人之外，重有不少奇人出現，好似噚日一位李泰華先生，就令報名處嘅人哭笑不得。
李先生自稱係中醫師，以前喺跑馬地執業，佢話陳方安生以下啲高官都幫襯過佢，好似煲呔曾、阿松、梁愛詩、葉劉、鄺其志等等。講到自己咁威，咁佢又攞咗幾多個猛人提名呢？李先生首先打個突，之後話：「我識咁多人，使乜提名？」係嘅、係嘅，你話乜就乜啦！
轉個頭，民主黨三子上嚟報名，出名大頭蝦嘅何俊仁簡直將「懵」嘅精粹發揚光大，首先係佢同涂謹申都唔記得帶證件相，要落樓下快圖美即影即有，順便企響度填埋張報名表。點知仁哥話咁快就唔記得自己影相有冇畀錢（當然有啦！），出去之後又話唔見咗啲相，入返快圖美搵，之後又喺自己身上搵到，再之後又擔心相片唔畀用膠水貼，真係一片混亂，十分精采！
傳真︰2623-9278
電郵︰