陳淑蘭同苑瓊丹喺下個月二十三號到二十六號，會喺灣仔新伊館開四場「藝壇雙截棍——今日女人不再是弱者」嘅棟篤笑。蘭子同苑仔前晚喺九龍塘羅浮宮婚紗店影宣傳海報，佢哋着得好誇張，酥胸半露。
點解蘭子同苑仔突然咁豐滿？原來佢哋「裝假狗」。自爆上圍得32AA嘅蘭子話用咗三個墊托胸，想再塞都塞唔入，佢話：「我嚟緊會做豐胸瘦身產品嘅代言人，希望可以增至『34AB』啦。」
早前成龍好激動咁呼籲記者唔好影女人個胸，蘭子同苑仔前晚着得咁性感畀記者影相，驚唔驚俾成龍鬧？蘭子話：「每個人行嘅路唔同，我擺明就係行性感！」之後佢哋專登一齊俯身任影唔嬲，苑仔大大聲聲咁話：「唔關你哋事㗎，唔係你哋企高影，係我哋烏低身畀你哋影㗎！」
劉德華噚日同世界短跑好手鍾絲，去灣仔出席「TAGHeuerUltimatePerformance」記者會，華仔獲大會送咗一隻價值約三萬蚊嘅名表，好鬼架勢。
司儀透露華仔曾經有十一秒六嘅一百米賽跑成績，問華仔敢唔敢同鍾絲比賽？佢話：「唔係好敢，需要好大嘅勇氣。不過佢知我鍾意打保齡，我都約咗佢去打。」
另外，有周刊影到華仔同李進食飯，有傳李進嘅MusicNation力邀華仔加盟，華仔話同李進只係傾舞台劇嘅事喎！
男歌星同朋友猛鬧佢公司嘅老闆係禽獸，平時聽到人哋話老闆鹹濕，佢都唔信，但男歌星早排見到有個靚女行過，老闆即刻流晒口水，眼甘甘咁望住個靚女，連自己姓乜都唔記得。
而男歌星因為唔肯陪老闆去應酬，所以老闆從來冇落力幫佢做宣傳，男歌星同朋友呻話呢啲咁嘅公司簽唔簽都罷！
雷頌德（阿Mark）噚日以AlfaRomeo汽車代言人身份，去銅鑼灣遊艇會出席新車記者會。佢揸住架AlfaRomeo147出現，不過佢話睇中咗價值四十幾萬嘅Alfa156GTA。阿Mark話：「我重未揀顏色呀，一定唔會紅色同紫色，因為我屬雞，我試過揸紅色車，結果遇到車禍，之後我就賣咗架車。」
羅蘭、譚炳文同劉丹噚日喺電視城，出席無綫十一月星辰生日會。問劉丹有乜生日願望？有人笑住話係時候飲新抱茶，劉丹就話：「冇諗過，呢啲嘢順其自然啦，我又唔會催佢（劉愷威）嘅。」
羅蘭下周三就六十七歲生日，問佢有冇諗過退休享福？佢話：「冇諗住退休，到冇人請嘅時候先自動退休啦。」