美國失驚無神減息半厘，幅度比市場預期為大，加埋格老對經濟前景並非看得太淡，話經濟同通脹風險得到平衡，刺激美股上升。不過阿虎有少少懷疑格老是否口不對心，如果經濟唔係太差，其實毋須減半厘息咁誇張。美國減息1/4厘作用唔大就係人都知，亦可能因為咁，格老先至咁重手減息半厘及出埋口術，一句「經濟風險得以平衡」，即時可以令人聯想到經濟可能見底，有機會回升。不過，若格老連息都唔減，佢嘅言論就更加有說服力。
現時銀行存款利率只得象徵式0.01%，每1萬元1年只得1元利息，真係無陰功。現時真係買藍籌或公用股收息好過存錢在銀行，其中恒生銀行（011）最具投資價值，因為恒生在放款方面一向保守，股息率又高達5.7%。
此外，一旦經濟好轉，壞帳減少，恒生股價又可以跟隨大市上升，屬可攻可守的最佳選擇，因此，恒生股價一直企硬於80元以上，但市場擔心恒生息差收窄，噚日遭到沽售，收報85.75元，跌1.15%。其實只要本港物業市場不再大幅下滑，投資本地藍籌股之風險有限。
最近經紀行一間又一間執笠，香港股民的投資意欲仍十分低迷，縱使資金由銀行存款調入港股，由於資金主要以長線投資為主，並非短炒，相信好難令成交大幅回升。
電視廣播（511）噚日一度勁升8%，突破30元水平，市場傳出電視廣播取得廣東落地權。其實呢個只係舊聞，不過噚日傳到似層層，吸引唔少投機盤炒作。其實市場早就預咗電視廣播會獲批廣東落地權，股價早已反映，可能係近期實在太悶，稍有消息，炒家都借勢炒一轉。
阿虎