愛客家菜因為感覺像返屋企食飯，材料全是常見的，賣相並不美輪美奐，惟以味道取勝，然而客家菜在香港的選擇愈來愈少。上個禮拜在地鐵將軍澳寶琳站附近新開了一間「客家好棧」，試過該店幾碟菜式，屋企餸嘅感覺好像又回來了。
記者：陳冰麗
攝影：陳陶鈞
酥皮焗釀原味雞$98/隻
酥皮焗釀原味雞是這裏的招牌菜之一，份量夠多，6-8人食都可以。酥皮底下是客家傳統的乾蒸雞，利用清遠雞，釀入紅棗、當歸等藥材，然後放燉盅內蒸上約2小時，最後包上酥皮再焗15分鐘左右。外層的酥皮又香又脆，內裏的雞肉嫩滑鮮甜，汁更是精華所在，撈飯一流。提提大家一日前預訂最穩陣，皆因每日限量約十八隻左右。
白色兩款茶粿分別是鹹味茶粿，一款是有沙葛、菜脯、芥菜粒、豬腩肉碎有等為餡，另一款則是有蘿蔔絲、豬腩肉碎、冬菇粒、芥菜粒。黑色的一款則是叫烏卒卒的甜味茶粿，餡中有椰茸、花生、白芝麻，非常香口。
梅菜扣肉包是一款頗有特色的客家點心，以梅菜扣肉為餡，包在外夾住一齊食，不肥不膩，鹹鹹哋嘅扣肉又夾雜梅菜的香甜，口感、味覺互相配合。
這個三色甜品糖不甩分別有原味、綠茶味及甘笋味，以糯米粉、麵粉、糖、水、豬油等所製，食落煙煙韌韌，軟滑適中。平時不大喜好無餡丸子的我，也一口氣連吃四粒，配以椰茸、黃糖粉、手磨的花生、芝麻等糖粉一齊食，更香口！
梅菜扣肉令人又愛又恨，愛它夠惹味，一食會上癮，恨它則太過肥淋淋，多食又怕影響健康。這裏的梅菜扣肉因為是選取五花腩中間肥瘦適中的部份，所以燜熟後的扣肉也不太肥膩，而且重有五花腩的香味，配以帶甜的梅菜一同食，香甜爽滑，食飯送粉麵都好正。
鍾意食豆腐的話可要試試這個煎釀豆腐，因為是採用山水豆腐，生煎過後食落依然好滑，豆腐面的釀餡有豬肉、蝦米、乾葱等，全部均以人手剁碎，食落更香及具口感。問了十位在場食客，似乎老人家較為喜愛，年輕的略嫌清淡了一點。
豬腳薑呢樣食物非有人「生產」，在家都好少會刻意煲來食，小記雖然最愛媽媽煲的豬腳薑，但亦本着一試無妨的心態，意料之外，香醋確又幾香甜，豬腳重好入味，而且又不太肥膩，可以再encore！
記者小評：呢度啲價錢總算平，四個人嚟食飯叫齊招牌菜原味雞、梅菜扣肉、香煎豆腐等，平均每人都係約$43，價錢同快餐店差唔多，而且每碟菜都保留住客家菜抵食夾大件嘅特色，可以一試。
由下午二時至四時半即有下午茶特價點心，小點$6.8、中點$9.8、大點$12.8、特點$15.8，其餘時間均以原價計，即每款加多$3，想以優惠價享用同類型點心，就要睇準時間入座，皆因每日下午茶時段都幾墟冚㗎！
客家好棧
地址：將軍澳新都城3期2樓227號舖
電話：31946648
營業時間：11:00am-12:00mn（星期一至五）、9:00am-12:00mn（星期六、日及公眾假期）
座位：約300個
付款方法：現金或信用卡