前日聯賽盃就共有五支英超聯球隊俾次級球隊淘汰，但呢啲都唔算新聞，因為習慣晒，反而阿仙奴主場輸畀極頹嘅新特蘭就有古講嘞，重證明除咗除費格遜外，兵工廠領隊雲格都係鍾意出口術嘅。
雲格賽前話好尊重呢個賽事，希望踢多幾場當磨練，重連皮利斯都上陣，結果引到臨場捧場客對阿仙奴信心十足，票數強勁，最後重讓到一球/球半。
點知臨場睇番嗰陣先知大鑊，皮利斯確係復出，但其他絕大部份係副選，甚至係好耐冇見嘅二打六，結果領先兩球後下半場連輸三粒出埋局。
如果雲格好似佢賽前咁講重視後生仔，畀佢哋多啲踢呢類盃賽，咁我求大俠就要講聲，踢一場咁嘅盃仔賽冇用㗎，要練班波就要認真啲去踢。
總之，呢個故事教訓我哋，口不對心嘅唔單止費爵爺，雲格其實都係咁，天下烏鴉一樣黑，唔好咁天真呀！
好多出名球員不時話踢到殘，但係有啲就得閒到好似失業咁冇嘢好做，曼聯門將列卡度同阿仙奴門神沙賓就係最佳人辦。話說曼聯對李斯特城嘅聯賽盃陣容中，就用卡路爾把關，列卡度個名竟然連後備名單都冇，而沙賓更未為阿仙奴踢過一場。總之，我就覺得列卡度加盟後，巴夫斯就穩咗；至於沙賓就真係唔知點講好嘞，因施文今屆表現真係令人搖到頭都甩埋咁制……
有人話前日九場意甲聯入咗三十二球已經係好多，但唔使大驚小怪，因為禮拜日有場瑞士甲組波，尾二嘅聖加倫竟然以三比十一輸畀對手，呢個賽果重打破咗瑞士國內一場波嘅入球紀錄。另外，呢幾日聖加倫球員之間冇講過一句嘢，教練都炒埋。我求大俠好同情呢隊波，話晒佢哋喺歐洲球壇都有啲名氣，淪為咁嘅紀錄保持者，點會有心機？希望換咗教練後，佢哋生生性性，打番上去啦！
我求大俠噚日睇電視新聞片，霎眼見到踢西班牙盃嘅皇馬球員麥馬拿文做咗球隊隊長，都幾威，諗諗吓又覺得佢真係有啲運；佢一直以嚟都冇乜受傷，人工又好，一有機會就強調佢好忠心同喺皇馬好開心，而且皇馬一直外援至上，唔似得上陣都交足功課嘅土炮摩連迪斯，因佢唔夠同胞魯爾咁搶鏡，結果重好有機會被賣走㖭，呢啲就叫做同人唔同命嘞。
曾經踢過羅馬同埋熱拿亞嘅意甲名將悉路連尼響禮拜三病逝，享年四十二。咪睇小呢位仁兄，據講強如巴里斯當年都要睇佢比賽影帶偷師。我求大俠最感慨係雖然佢因為患咗肌肉硬化症不良於行，但臨終前一刻重吩咐佢太太幫佢着番件熱拿亞波衫，十足古時啲將軍臨終都要着番件戰袍咁。呢份情操響當今球壇難得一見，好值得大家尊敬。
逢周一至周五見報