就嚟又到聖誕節，每年啲日本偶像藝人都會乘機推出啲應節禮品嚟掠水，佢哋當然要話到明係乜乜限量珍藏版啦。
今年年中推出過寫真集同詩集嘅Morning娘，自然都唔例外，把握機會推出一大籮聖誕精品搶錢，今年佢哋重一出就掠你五千日圓（約三百二十港元）！不過比起Morning娘上年嘅五嚿幾水嘅聖誕禮物包，今次佢哋對啲fans都算係仁慈咗㗎啦！但係抵唔抵呢，就真係見仁見智囉！
今年佢哋set禮物包叫「sweetmorningBOX2002」，一隻膠聖誕靴入面有一盒啤牌、六張tradingcard、立體聖誕卡、貼紙同小型聖誕樹，全部都有Morning娘嘅嘜頭，包裝得好鬼精美，最啱送畀啲幼稚園同小學生fans，佢哋收到嘅話，一定超級開心。不過對於啲年紀大啲嘅fans嚟講，呢個boxset都可以用嚟炒嘅！