蒲吧，找女拳手猜枚是指定動作，猜贏女拳手有得錫錫是新搞作。
遊戲簡單，拳腳又好兵器又好，你贏，獎品香吻一大個；你輸，罰你買支啤酒。你長贏佢長錫，但只有女拳手獻吻，你不能強吻；輸咗，可以猜到你贏為止。蒲友請謹記，眼看嘴巴勿亂動。
記者：陳漢榮
攝影：伍慶泉
辣椒吧經理Viki先慨歎：「生意難撈！」難撈又何如？「搞Function囉！以前搞過制服誘惑，反應唔錯，但Function一完就無晒誘惑，始終留唔住啲生客，不過我得出一個結論，如果個場多靚女拳手坐鎮，一定旺到飛天，因為係蒲友都鍾意同靚女劈酒。」於是，Viki決定招聘大量女拳手，並要求女拳手穿着白恤衫、格仔短裙上班：「橋唔怕舊最緊要受，就玩多嘢校服Look，個個女拳手都要成個學生妹咁款，我心目中想請夠9個，砌番隊酒吧版Cookies！」
舊瓶始終要添新酒，以下就是Viki上周開始的新噱頭：「我見班女拳手有時飲到HighHigh哋，都會同啲客玩到攬頭攬頸，既然大家都可以玩得咁放咯，不如玩吓新遊戲啦！落得嚟預咗劈酒，啲客都唔會介意嗰一兩支啤酒錢，叫做搞啲噱頭嘢，留住班熟客、吸引多班新客咁解啫。」怕不怕給人標籤為色情玩意？「千祈咪咁講，我哋係健康場，所以先旨聲明，任何情況都好，只有女拳手主動錫你，不外乎錫你額頭、面珠，客一定唔可以多手多腳，呢度唔係卡啦OK夜總會，唔好諗衰嘢。」
女客人Van見眾人玩得如此興奮，亦參戰，先叫「十五」，再叫「十五」，輕易勝出。芳芳鬧着玩強吻，Van一面叉頸，一面搖頭閃避：「咪搞！大家都係女仔，搞基咩？」場面勁搞笑！
「真係咀埋嚟，使唔使咁認真呀？」一鋪了結細K的Dick是這裏的熟客，與細K猜慣猜熟：「唔使佢講我都知佢最弱大話骰，除咗玩幸運骰，佢揸住骰盅輸咗十成九。」熱情獻吻，事前還搭着細K膊頭的他居然臉紅起來：「太熟反而唔自在，不過猜枚有女仔錫，呢條都算係好橋。」
Ron先輸兩板，勞氣兼不忿氣，戙高腳繼續猜，終在第三板打開勝利之門，芳芳攬頸獻吻，他反而有點不知所措：「乜真係錫落嚟？重要影相㖭？我有啲尷尬喎。猜贏枚有女仔錫，幾過癮吖，輸咗兩支酒，無所謂啦，反正唔輸我自己都會落Order，我都未劈夠酒！
「我叫佢錫嘴㗎，佢又唔肯……講笑啫！」直落連贏幾板One-Two的Sam開心得笑不攏嘴：「好好玩呀！有得猜枚又有靚女錫，難得佢咁君真，輸咁多鋪就錫足咁多嘢。佢咁識做，唔使輸我都嗌番桶酒，最緊要大家開心，Right？」啤酒送到，Sam纏着SiSi不放，再猜。
3位女拳手異口同聲說：「輸咪輸囉，錫咪錫囉，玩吓之嘛，未驚過！」雖則話玩玩吓，但玩遊戲無人想輸，她們猜枚技術如何高超，總有強項與弱項，難得她們肯自爆，到時你就識點揀啦！
SiSi（21歲）：「我最渣猜One-Two，講真呢隻枚又唔係難猜，唔知點解猜嚟猜去都唔熟，嗌嚟嗌去都係同一點數。輸咗要錫人，我唔會尷尬，猜咗成個禮拜，都未試過俾人毛手毛腳！」粗略統計，SiSi猜三板輸兩板贏一板，逢二進一，果然係「One-Two」！
芳芳（19歲）：「講埋畀你知都唔怕，十五二十我最弱，雖然未至於嗌『清、對』就玩完，但成日窒枚，又或者跟唔切枚。輸咗錫吓面珠搞吓笑啫，我唔覺得蝕底喎。」記者技癢挑戰，五勝四負，發覺她經常窒枚，拾吓拾吓渣到痹。
至強：大話骰、抹車
至弱：十五二十
細K（19歲）：「淨係骰盅蝦到我，雖然好多人教過我玩大話骰嘅竅門，但渣就係渣，因為我唔識講大話，講親大話都會口窒窒。咀人？唔驚，有時我猜到WingWing哋，都同啲熟客玩到癲啦！」在旁觀戰，細K愈玩愈輸，愈輸愈飲，愈飲愈玩得渣。
至強：瓣瓣掂
至弱：大話骰
小資料
店名：辣椒吧
地址：尖東麼地道77號華懋廣場地庫全層
電話：27230188
營業時間：5:00pm至4:00am
收費：
HappyHour（5:00pm至9:00pm）：生力、嘉士伯$90半打，其他啤酒$16一支
NormalHour：生力、嘉士伯$168半打，其他啤酒$32一支