二十三條悍將葉劉淑儀，維護立法嘅表現一直勇猛非常踩到盡，噚日去立法會終於溫和些少，重開始識得講笑。
當葉太被議員不斷追問，佢重申政府唔係假諮詢之後，話咁快又要再企起身答過，點知佢口快快，一企起身就叫咗立法會主席范徐麗泰做「局長」，雖然後來改口都冇用，惟有坦白咁話：「得罪咗你呀主席，聽局長聽得多！你比局長更崇高！」
咪以為葉太擦鞋呀，事關佢講緊嘅係事實，因為立法會主席在政府排名名單上，名列第六，而司長以外的主要官員都係排名第七咋！
講開二十三條，保安局前兩日出咗兩張全文字，完全冇圖像嘅單張再作解釋，有啲人睇完話悶，點知原來呢個係葉太嘅意思。佢話覺得呢個咁嚴肅嘅題目，用漫畫表達好容易歪曲，佢認為用文字解釋就最好！
傳真︰2623-9278
電郵︰