市場憧憬減息，港股噚日升118點，收報9773，成交增至67.76億元。市場一般都認為，若美國減息，反映格老認為美國經濟唔掂。其實減息作用已經唔大，因為去年美國減息逾4厘，對經濟刺激亦有限，充其量只係幫助經濟軟着陸而已，就算美國今年第4季再減息，幅度亦相當有限，作用唔大。
不過，唔知點解近日淡友平倉觀望減息，似乎信心唔夠，舉棋不定。黑客話，現時嘅形勢，不論是否減息，大戶都可借勢造上或造落，所以都係睇定啲。
恒基發展（097）噚日復牌大升21.85%，收報7.25元。今次恒地（012）以每股7.35元私有化恒發，較恒發每股資產淨值6.78元有溢價8.4%。通常私有化都係大股東想趁低執平貨，點會出價高於資產淨值？原來恒發每股資產淨值，未包括旗下中華煤氣（003）、香港小輪（050）及美麗華（071）的實際價值，而四叔主要是吼實中華煤氣，成功私有化後，恒地大有可能會進一步增持中煤。
恒發進行私有化，市場開始尋寶，搵緊重有冇股價低殘，但資產淨值高嘅股份，股民結果冇吼阿虎提過嘅長建（1038），但就追捧會德豐（020），此股單日升5.5%，收報5.70元，成交5956萬元，的確係威係勢。不過，會德豐系一向出手低，即使提出私有化計劃，亦未必為股東所接納，海港企業（051）私有化失敗，正是最好例子，博唔博得過，大家要諗清楚。不過，現時由吳光正揸fit，可能會好啲。
利來（221）今日掛牌，大股東持有75%股權，22.5%股權由15名投資者持有，餘下2.5%％由172名公眾股東持有。換言之，此股貨源非常歸邊，幕後想點玩都得。
阿虎