同行如敵國，有競爭就實屬難免；早兩日，亞Mark披露咗萬事得部全新Mazda2，會響今個周末正式登場嘅同時，被視為Mazda2主要對手嘅福特Fiesta，查實亦經已整裝待發。聽聞代理會響今個星期尾，以廣告形式向車迷披露Fiesta嘅消息外，重打算響今個月下旬正式登場㖭！據線人透露，話新車嘅宣傳單張同價目表亦早已準備就緒，新一輪CityRV迷你小車市場之爭，可謂如箭在弦。
亞Mark所知新款Fiesta，唔係以價廉物美為主打，而係用上設備創新齊全、物超所值作賣點，並以一台低、中轉表現強悍嘅1.4公升直4偈掛帥，匹配埋一套全新半自動波箱，既有高雅嘅電鍍鬼面罩裝飾，又有全套15吋合金胎軨配襯，單係上述嘅配備，睇嚟新一代CityRV迷你小車嘅定位，會直逼轎車級數㗎！有興趣嘅Fans就要拭目以待喇！