一位讀者曾問及《造元化鑰》可以去邊度買得到，左丁山請佢去中環嘅「上海印書館」。現有另外一位讀者來函話：「九龍方面有一間『通勝堂』及其他個體戶書店亦有售。」大家可以多一個參考。
一位署名「香港特產」嘅讀者B來函訴苦：「九七年買樓，現淪為負資產，生意又失敗，現時以信用卡及私人貸款供樓，等政府打救，結果是債項愈滾愈大，樓宇現在倒貼二十多萬也沒人接手。」呢個現象非常普遍，左丁山旁邊之人，就有一位賣樓之後，重要欠銀行六十萬，正同銀行講緊數，要求分五年清還。左丁山認為負資產應壯士斷臂，賣樓先至講，無謂拖死自己。按理銀行嘅選擇就係（一）唔准賣樓，要照供，但係客戶如果因此破產，銀行亦冇益處，譬如貸款百五萬，樓價現值九十萬，就算銀行強迫攞番層樓去賣，仍然要撇帳六十萬。（二）假如准客戶賣樓，還番九十萬，剩低六十萬分期供，總算有機會攞番多啲還款，唔使撇帳足六十萬。假如我係銀行話事人，一定制。再拖落去，會係雙失局面：層樓會繼續跌價，銀行撇帳更多，客戶負債更重。讀者B相信已陷於破產邊緣，應該同銀行開誠布公攤開晒嚟講。至於邊間銀行容易傾，左丁山不便介紹，希望你嘅銀行明白事理。