紅磡海名軒第三座嘅招租廣告前幾日出街，呢座由發展商長實喺10月頭賣咗畀某財團嘅物業，照計已經同長實都冇乜關係。但係蘭西發現業主身份極度神秘，睇勻成個廣告都唔見佢個大名，咁都唔出奇，打探一輪，據聞連負責招租嘅代理都唔知邊個係業主，亦未曾接觸過佢哋，反而過氣業主長實成為話事人，由頭到尾同代理開會傾進度。
究竟邊個先至係業主？長實又以乜嘢身份處理招租事宜？真正業主最終會唔會出嚟，同大家見面解畫呢？
邊個係業主都好啦，首推十個十五樓以下嘅低層單位，平均每呎全包三十一蚊，比起第二座二十樓以上嘅二手租盤，貴兩、三成，聽講高層呎租去到四十五蚊，同市場脫晒節，就好似海名軒嘅車位，月租五千蚊，堪稱全港最貴租嘅住宅車位。
海名軒第三座喺十月全幢易手，由單一財團購入，總樓面21.2萬呎，市傳成交價超過十四億。
發展商賣樓為先聲奪人，好多時會為物業起啲有氣勢嘅名，令人印象深刻。恒隆啱啱收到售樓紙嘅九龍站四期TheHarbourSide（圖二），終於有中文名嘞，就係「君臨天下」。𠵱！個名好似聽過嘅，翻查資料，原來新地喺99年將西半山寶翠園一期二十四個頂層複式，用呢個名重新包裝發售，但成績就麻麻。恒隆唔怕撞，改埋同一個名，唔知銷情會點呢？
話時話，第日同人講起君臨天下，就要講清楚係邊個，以免啲的士大佬去錯地方。
吹咗好耐嘅救市「甘露」，重係得個等字，發展商心急賣樓程度與日飆升。好似嘉華地產嘅馬鞍山嘉華星濤灣（圖三），繼之前錄得一宗呎價四千一蚊嘅相連單位交易後，噚日市場又有超過6宗分層成交。但發展商對此三緘其口。
聽聞，發展商傾向將第一座以內購形式洽售。噚日錄得單位均為第一座，最好價係十九樓B單位，736呎，成咗255萬，呢個價喺市區有唔少選擇。五樓678呎G單位，入場費186萬元，以遠期樓花嚟講，都算難得。
話時話，個盤未開價同付款方法，就賣到唔錯價錢，都算試到個市有承接力，大可放心開盤啦。
九龍倉嘅尖沙嘴擎天半島二期，就快開賣，又係代理搵食嘅時刻，各行都做定宣傳催谷。中原今日就率先搞簡布會，話委任幾個「AAA」級豪宅尊者駐擎天半島售樓處，為客戶提供A級服務、A級訊息同A級嘅經驗，等客戶可以買到A級嘅物業喎。今日嘅記者會自然唔少得九龍倉嘅大紅人黃光耀啦。
而鴻運禮拜五嘅全民大會，第一節就係向同事介紹擎天，黃生自然又要現身。後半段就介紹馬鞍山嘉華星濤灣同上環帝后華庭，同埋就之前搞嘅比賽頒獎。
各商家要把握時機啦，機場禁區內東大堂，進行擴建工程，將推出近二萬七千呎，開百貨公司，𠵱家公開招標經營牌照，十二月三十日截標。
機管局數字指出，香港國際機場舊年全年有三千三百萬人次進出。嘩！每日超過九萬人，喺裏面開番間舖，一定唔憂做，難怪淨係攞招標文件，都要畀低八千蚊。但業內人士話，只會吸引已喺機場營業嘅舊商戶，因佢哋較容易估計到實際生意額喎。
蘭西
電郵地址：