美國女歌手籮霸珍妮花洛庇絲（JenniferLopez），近排出入都戴住隻鵪鶉蛋咁大嘅鑽戒，有人自然忍唔住問佢係咪同男友班亞弗力（BenAffleck）訂咗婚啦，佢又懶神秘唔肯認。不過早兩日籮霸接受電視台訪問，竟然無端端自爆佢真係同班仔訂咗婚喎！
前幾日美國廣播公司名嘴DianeSawyer喺節目《Primetime》入面訪問籮霸，提到佢嘅戀情時，籮霸好得戚咁話：「係呀！我哋（同班仔）已經訂咗婚嘞！」雖然外間有傳聞話班仔阿媽唔多鍾意籮霸，不過籮霸依然強調佢同班仔真心相愛，實會天長地久喎，遲吓重會結婚㖭！
其實唔好話我羅拉睇死籮霸，查實佢九七年同餐廳侍應OjaniNoa結婚，同埋上年九月同舞蹈員CrisJudd拉埋天窗嗰陣，夠話愛佢哋一生一世啦，點知兩段婚姻都係得一年貨仔，難怪佢同班仔嘅戀情冇人睇好！