曼聯領隊費格遜講嘅嘢真係唔好信。話說前日曼聯喺聯賽盃對李斯特城前，佢講明暫時唔使碧咸比賽，等佢陪老婆定吓驚，另外又會畀啲主力休息喎，之但係到比賽時碧咸成個戙喺度踢正選。最後曼聯贏兩粒，以為曼聯殘陣貼咗下盤嘅真係有冤無路訴囉。
唔只碧咸踢正選，當曼聯久攻不下，重派埋史高斯同華朗落場，終於紅魔就喺完場前十分鐘內連入兩球致勝。今次事件畀大家一個好明確嘅訊息，就係啲領隊成日喺賽前放流料，波友想估波準，除咗睇我哋名家賽前分析外，重都要喺賽前上網留意吓啲出場陣容，否則中伏就唔抵啦。
世界排名由季初一百二十位飆升到𠵱家十六位嘅泰國網球手斯里查潘，話自己係虔誠佛教徒，每晚都念佛經。佢有冇祈求佛祖賜畀佢力量，我求大俠就唔知，但佢就好希望能躋身世界前十；佢話宗教能夠令佢鬥志堅強，但似乎這位泰國小俠尚未參透勝負同得失呢關，睇情形要聽多啲佛偈嘞。
呢個世界有唔少人衰咗唔肯認錯，好彩羅馬嘅卡斯辛奴就衰唔晒，最近就返球會向教練卡比路道歉，話知道自己上個禮拜無端端擅自離隊唔啱喎。我求大俠覺得佢都算有自知之明，人哋愛華頓件新星朗尼就話有籌碼同球會傾條件啫，你卡斯辛奴踢羅馬咁耐都無咩表現，同球會高層頂頸咪盞自己蝕底！
江湖傳聞曼聯想吸納喺AC米蘭失寵嘅舒夫真高，重話舒夫真高最近透過經理人聯絡踢過曼聯嘅同胞簡察斯基，問吓加盟曼聯嘅意見。簡察斯基劈頭就話：「唔好去！」計我話舒夫真高就算再問兩位喺英格蘭踢波嘅同胞盧茲尼同埋列布夫，答案都可能一樣。鬼咩，個個都喺彼邦撈唔掂，肯定有偏見，舒夫真高不如信自己啦。
雖則話莫斯科斯巴達一早喺歐冠盃出局，但估唔到佢哋喺禮拜二主場對巴素利場波得幾千人睇，喺歐洲賽嚟講入座率算奇低。其實類似情況已經唔係第一次出現；記得上屆祖記主場對阿仙奴場例行公事，場邊狗吠聲重大過球迷吶喊聲。踢兩圈分組賽就預咗會實力有參差，例行公事自然多。
逢周一至周五見報