傳統智慧教落，投資公司一般都係短炒一陣就停手，皆因散戶甚少參與炒作，所以好難長炒長有，但富泰大中華（1226）9月中以每股0.50元招股上市，一直炒到𠵱家，股價幾乎日日創新高，上市唔夠兩個月，股價已經升咗1倍有多。噚日隻股再升6.48％，收1.15元，又創新高。
小初以前都提過，富泰大中華班幕後炒家，過往炒股手法鍾意一支箭咁抽高，然後先至慢慢派發。但睇番呢隻股走勢，則比較有秩序上升，到𠵱家重係見同一批證券行，日日掛牌出出入入，而公司又靜英英，唔見走出嚟吹水。究竟幕後係咪部署緊大project，等待時機郁手呢？
另外，今日掛牌嘅利來控股（221），完全擺出一副戰鬥格，自己出埋通告事先張揚，講到明貨源歸邊，話15名投資者認購嘅新股，已經佔咗發行股數22.5%，最大1個重揸咗9.51%。睇嚟利來今日掛牌會有一番炒作。
慕容小初