李惠敏（Amanda）前晚八點幾，自己一個人喺跑馬地出現，佢孭住個Dior手袋，同埋攬咗條Burberry大圍巾，重戴埋頂畫家帽加黑超，成個人包到實一實，唔落足眼力睇真啲，幾乎認唔到佢。
Amanda首先行咗去街市附近嘅一間燒臘舖，買咗一袋價值十三蚊嘅雞膶，之後就行去對面街嘅櫃員機㩒錢，再行去隔籬間生果舖買生果。Amanda買完嘢之後，就行返去跑馬地嘅屋企。
早排Amanda重好鬼風騷，同住喺佢附近嘅陳浩民玩得好埋，佢兩個唔只俾人影到一齊去銅鑼灣睇戲，有次Amanda重俾人影到喺陳浩民屋企行出嚟，可惜𠵱家陳浩民已經另有新歡佘詩曼，難怪Amanda孤零零買完雞膶，都唔去探老友啦！
韓君婷噚日喺電視城綵排《萬千星輝賀台慶》序幕歌舞，韓君婷率先示範軟骨功，壓腿拉筋，佢話：「我細個學過芭蕾舞，啲筋好鬆，𠵱家都冇咁勁，以前重好啲。不過最近練舞都要就住就住，因為之前扭親隻腳，好得八成，隔日要去睇跌打。」
同樣有份展示身手嘅黃卓玲就話：「因為我玩咗一年瑜伽，同埋平時我每日起身都會拉筋一次，所以啲筋好鬆。」
任賢齊同藍心湄、呂良偉一班朋友，組成咗一間公司，投資過億代理全中國嘅adidas商品。小齊早前特別到上海簽約，佢女朋友Tina亦都有陪去。小齊等人到上海嘅新店巡視業務，吸引咗成班歌迷圍觀，身位小齊女友嘅Tina就喺店入面打理一切，等小齊一個人應付啲熱情嘅歌迷。
羅文好友兼合夥人玲姐，日前交代咗向劉鑾雄借錢事件嘅來龍去脈，重話劉培基知情。劉培基本來話噚日會開記者會講清楚，但突然間縮沙，記者追問佢，佢將件事推得一乾二淨，話自己喺泰國，記者會係羅文助手阿東要開嘅，又話阿東會轉為發聲明。𠵱家有消息話阿東要今日先發聲明，都唔知班人搞乜鬼。
日前在深圳辭世嘅藝人羅烈，聽日喺深圳沙灣殯儀館舉殯，喪禮以佛教形式進行，之後喺當地火化。噚日羅烈個仔王駒透露，佢舅父唐季禮近日為喪事奔波香港同深圳之間，因為香港亦有好多親友想追悼羅烈，所以後日就會喺香港殯儀館為佢舉行追悼會，到時羅烈生前嘅一班好友狄龍、劉永、井莉同陳觀泰都會出席。