馬來西亞是香港人的旅遊勝地，不過未必人人都鍾意，以讀者阿Ling為例，即使去了十幾次泰國，都不會選擇到馬來西亞。自一次跟老公去了馬來西亞一趟後，竟然被惹味的馬來西亞菜深深吸引，更開始享受當地的風情，還跟當地的華僑學煮馬拉菜，當中以肉骨茶及咖喱蝦最耍家。不過阿Ling所煮的馬拉菜經過改良，味道更切合香港人的口味。
記者：區佩嫦
攝影：周旭文
據東南亞餐廳的負責人講，原來肉骨茶係清朝末至民初時期，由一班被賣去南洋做豬仔的福建人「創製」而成，初時叫做「呠Good嗲」，呠即肉、Good即骨，而嗲即係茶。話說當時班工人多數喺碼頭做體力勞動嘅工作，每日都搬啲中國藥材，佢哋就將藥材啲頭頭尾尾，再買啲下欄嘅唐排煲湯飲。由於班工人覺得有中藥嘅湯可以補充體力，所以每朝都將「呠Good嗲」送飯或者做早餐。
傳統嘅肉骨茶有好多藥材，分別係當歸、杞子、八角、花椒、辣椒、小茴、大茴等，再加埋唐排炮製而成，由於藥味太重，唔係人人都接受到，就好似讀者阿Ling的囡囡，就嫌湯太重藥味唔鍾意飲，所以阿Ling就特別加咗竹絲雞，將肉的鮮味掩蓋濃濃的藥材味，效果就出人意表地好！
試味報告：曾經有飲完肉骨茶後勁標暗瘡的經驗，所以我都幾抗拒肉骨茶，不過飲過阿Ling所煲嘅肉骨茶後，發覺藥材味較淡，而且味道鮮甜，飲完又無出暗瘡同生痱滋，一改對肉骨茶嘅壞印象。
材料
川芎 約3片 杞子 10粒
玉竹 約3片 當歸 1粒
桂皮 約5片 熟地 1小片
黨參 1條 胡椒 少許
大茴 少許 丁香 少許
南棗 2粒 單子蒜 7粒
竹絲雞 1隻 肉排 半斤
做法