八方呢輪日日數香江名校點威，連新法出咗個馬時亨做問責局長都數埋，有位聖約瑟校友──新巴董事總經理許雄就好勞氣咁話八方有眼不識泰山，佢哋都有唔少威水校友，而且學校亦歷史悠久。
於是八方同許老兄就企喺酒樓度逐個數，嚟自St.Joseph'sCollege嘅猛人又真係唔少，有馬會主席夏佳理、醫管局主席梁智鴻、考試局主席周明權、《基本法》委員鄔維庸、前工商局局長周德熙、退休多時嘅高官廖本懷同李越挺、重有至威嘅光纖之父高錕、德高望重嘅銀行家利國偉等等，所以唔好話皇仁仔、華仁仔或者英華仔叻晒。
見到許雄咁鬼生猛，又容光煥發，八方不禁問佢點樣保養得咁好，佢竟然大聲話，咪因為離開咗政府囉。咦，咁講都得？咁巴士又有冇空間減吓價呢？「冇，肯定冇，我連老闆鄭生都說服過。」
（圖）聖約瑟書院都出過唔少猛人，包括馬會主席夏佳理（右）同醫管局主席梁智鴻。
傳真︰2623-9278
電郵︰